Удж — республикаса олысьяслы
Коми республикаса экономикаö да социальнöй юкöнö колана специалистъяöс кыскöм йылысь сёрнитiсны республикаса правительстволöн чукöртчылöм вылын.
Уджöн могмöдан шöринлöн юöртöм серти, талун республикаын зэв ёна оз тырмыны унасикас уджалысьяс. 2014 вося июль 1 лун кежлö артавсис матö 17 сюрс прöст места. Йöзöс уджöн могмöдан республикаса управлениеысь начальник Сергей Козловлöн кывъяс серти, медся ёна оз тырмыны вылi тшупöда тöдöмлунъяса специалистъяс мупытшса озырлунъяс перъян юкöнын (став колана специалистысь 20,6 процент). Тайö йитчöма сыкöд, мый Комиын тайö юкöнын пöртсьöны олöмö инвестицияа унасикас балаяс.
Комистатлöн лыдпасъяс серти, вахтаöн республикаын уджалö 40 сюрс гöгöр морт. Кыдзи юöртö уджöн могмöдан республикаса шöрин, кызвыныс на пиысь — мукöд регионъясысь воöм йöз, сы вöсна мый вöлi вöзйöма вахтаöн уджалан 15 сюрс места, а шöрин могмöдiс уджöн öти сюрс мортöс. Мукöд обласьтъясысь уджавны воöм йöзысь кындзи, республикаса предприятиеяс вылын зiльö суйöр сайысь воöм 5 сюрс гöгöр морт. Кыдзи эскöдiс С.Козлов, государство сюся видзöдö та бöрся, тайö сетö позянлун кутны чорыд дöзьöр улын суйöрсайса олысьясöс удж вылö примитöм.
«Ми сувтöдам аслыным мог, тшöтш и инвестицияа балаяс олöмö пöртiгöн, кор найö вайöдöны уджалысьясöс кыськö Комиысь бокысь. Сiдзжö дорйыны и республикаса олысьяслысь правояс прöст уджалан местаяс вылö йöзöс корсигöн, — тöдчöдiс республикаöн веськöдлысь Вячеслав Гайзер. — Такöд йитöдын ми лöсьöдiм законлысь бала, кодöс талун пыртöма видлалöм вылö Госдумаö, медым инвестицияа гырысь балаяс олöмö пöртiгöн быть урчитны уджалан местаяс и республикаса олысьяслы».
Комментарии: