Май 15 лунö Кулöмдiнса культура керкаын мунiс «Супербать» республикаса конкурс, кодi йитчöма «Йöзöс социальнöя дорйöм» балакöд да семья пытшкын бур оласног кыпöдöмкöд. Конкурсö пырöдчис районлöн сикт-посёлокысь сизим семья, кодсюрö локтiсны весиг пузчужöм кагакöд. Нёль конкурсын батьяслы колiс петкöдлыны сюсь вежöр, тэрыблун да пельклун, челядьöс ворсöдан-велöдан да артисталан сям, компасöн да картаöн вöдитчан кужöмлун. Конкурслысь став тшупöдъяс венöм бöрын комиссия бöрйис вермысьöс, кодöн лоис Немдiнысь Сергей Васильевич Мамонтов. Сiйö петкöдчас конкурслöн мöд тшупöдын Сыктывкарын.
— Миян шуда семья артмöмсянь колис нин 8 во, — висьталiс Сергей Васильевич. — Семьяын ставыс тыр-бур. Ме уджала Смолянкаса школаын физкультура велöдысьöн да велöдан да воспитайтан удж кузя директорöс вежысьöн. Гöтырöй, Анастасия Михайловна, Немдiнса почта юкöнöн веськöдлысь. Быдтам кык челядьöс: Лиялы 7 арöс, таво пырас школаö, Артурлы арöс да джын.
Кольöм воын С.В.Мамонтов лэптiс керка ― аслас абу нин ичöт семьялы шоныд да шуда поз. Прöст кадö радейтö ворсны волейболысь да пызанвывса теннисысь и, дерт жö, ворсны ныв-пиыскöд, налы кад сюрö век.