Ода кора тöлысь 24-öд лунö Ручса шöр школаын кыпыда мунiс бöръя звöноклы сиöм гаж. Таво школа борд улысь петöны 9-öд классысь 14 велöдчысь (классöн веськöдлысьыс — Татьяна Николаевна Попова) да 11-öд классысь 6 велöдчысь (классöн веськодлысьыс – Татьяна Валериевна Игнатова).

Сценарий мунанногыс да залсö мичмöдöмыс вöлi йитöма саридз темакöд. Колö пасйыны, мый тайö лун кежлас челядь ёна дасьтысисны: мичмöдiсны зал, вöчисны декорацияяс, велöдiсны кывбуръяс да сьыланкывъяс. Сцена шöрын сулалiс алöйгöрд парусъяса корабль. Медводз челядьлы чолöмалана кывъяс висьталiс корабльвывса капитан – школаöн веськöдлысь – Нина Вениаминовна Холопова. Сiйö сиис челядьлы бура сдайтны экзаменъяс да аддзыны асшöр олöмын колана туйвизь. Сьöлöм вöрзьöдана кывъяс висьталiсны школа помалысьяслы Галина Алексеевна Нестерова, Аныб овмöдчанiнса юралысь да медводдза велöдысьяс-адмиралъяс: Галина Николаевна Кирушева да Наталья Анатольевна Расова. Налы отсасьысьясöн вöлiны юнгаяс – ичöт класса велöдчысьяс. Мича аттьöалана кывъяс школа помалысьяс висьталiсны велöдысьяслы, школаын уджалысьяслы да пыдди пуктана бать-мамныслы. Сценарийлöн кывкöртöдöн лои 11-öд класса велöдчысьяслöн школаын олöмлы сиöм видеоролик. Медбöръя звонок юргис 11 класса помалысь Ульныров Федор да 1-öд класса велöдчысь Холопова Ариана киясын.

Руч шöр школаса веськöдлысь Нина Вениаминовна Холопова