Кулöмдiнса Пятигорскын кык улича — Дальняя да Сосновая. Керкаяс сулалöны Кулöмдiнсянь юркарö мунан туйлöн öтарас и мöдарас. Видзöдан да, быттьö абу уна, а пыдöджык пыран да — быдса сикт. Медводдза керкаяс кыпалiсны 1993 воын.

— Миян да верöслöн вок Василийлöн семьяяс овмöдчим медводдзаясöн. Шогöдлiс: томъяс, а веськалiм вöрö. А сэсся керкаяс кыпалiсны тшакъяс моз, ставыс томъяслöн, ставныс тöдсаяс. Пыр на син водзын, кыдзи Алексей пиöй керка йöр сайын вотiс пув, а ме öшиньсянь видзöдi да чуксавлi, мед оз пыр вöрö. Юрсиктö локтöдз олiм Ухтаын. Сэнi дорысь танi лöнь, сынöдыс сöстöм, — воддзасö казь-тылiс Любовь Николаевна Мартюшева.
Йöз асьныс ёна котралiсны уналаö, мед югзисны уличьяс, вöчисны автобус виччыся-нiнъяс, нюжöдiсны ва труба да вöчисны мукöдтор. Вуджисны уна сьöкыдлун, но ловнаныс эз усьны. 2011 вося октябрын республикаса правительство вынсьöдiс «2011-2013 вояс кежлö социальнöй туйвизя коммерциятöм котыръяслы отсалöм» программа да сiйöс олöмö пöртöм вылö урчитiс сьöм. 2012 вося сентябрын Коми республикаысь муниципальнöй котыръясса юралысьяслöн чукöртчылöм вылын республикаса юралысь В.М. Гайзер шыöдчис водзö сöвмöдны овмöдчöминъясын öтувъя асвеськöдлöм. Шыöдчöм дорö эз коль бокö Кулöмдiнса овмöдчöмин. Кольöм во панасын Пятигорскса олысьяс чукöртчылiсны да лöсьöдiсны öтувъя асвеськöдлан котыр. Юрнуöдысьöн бöрйисны Любовь Николаевна Мартюшеваöс. Лоисны и сылы отсасьысьяс. Котыр пасйысис юстиция министерствоын. Кулöмдiнса овмöдчöмин да асвеськöдлан котыр уджа-лiсны öтув, лöсьöдiсны бала, кытчö пасйисны Пятигорскса олысьяслысь медся колана мог олöмö пöртöм — Дальняя уличвывса туй бурмöдöм. Тулысын да арын öдва вуджлiсны ва гöп, мед воöдчыны автобус сувтланiнö. Грант босьтöм могысь балаясöн пырöдчисны экономика сöвмöдан министерствоöн котыртöм конкурсö да вермисны. Вичмис 224148 шайт. Бöрйисны туй вöчöм вöсна кывкутысьöс. Медалiсны экскаватор, кодi кодйис туй пöлöн гуран. Сысянь вомöнöн кодйисны визьяс, мед мунiс ва. Туй улö сюйисны нёль труба. Вольсалiсны галяиз, шыльöдiсны-топöдiсны. Сэки öтувъя асвеськöдлан котыр шуис водзö пырöдчыны конкурсъясö, ас вынъясöн бурмöдны олöм. Таво овмöдчöминкöд öтув лöсьöдiсны Сосновая улич вылын туй бурмöдöм кузя бала. Вичмис 200 сюрс шайт. Лöсьöдiсны-бурмöдiсны вузасянiнсянь кыпалысь да сулалысь нин керкаяс дорö 250 метра кузьта туй. Кодйисны туй пöлöн гуран, туй улö сюйисны 10 метра кузьта труба. Таво пятигорсксаяс нöшта вермисны челядьлы ворсанiн лöсьöдöм кузя балаöн, мыйысь вичмис 539942 шайт. Сосновая улич вылын ёнмöдчанiн-ворсанiн нюжöдiсны вит метра вылö. Асьныс кералiсны пуяс, весалiсны, шыльöдiсны-потшисны. Бергаланторъяс, пыжъяс, машинаяс, качайяс, исласянiнъяс, ёнмöдчанторъяс да мукöдтор вайисны Чебоксары- ысь, кодъясöс сувтöдiсны нин.
-Бур, мый республикаса правительство сетö ыджыд тöдчанлун асвеськöдлан котыръяс сöвмöдöмлы, отсалö сьöм-öн. Миянöс öтувтчыны ышöдiс Кулöмдiн овмöдчöминöн веськöдлысь С.В.Рубан, пыр отсасьö. Асвеськöдлан котырлöн ыджыд позянлунъяс йылысь висьталiсны и И.И.Кинаш да Е.Д.Гичева. Со и öтувтчим да ас вынъясöн бурмöдам олöм. Сöмын правительстволы, конкурс котыртысьяслы колö уджа-лыштны на. Ми вермим, а сьöм вичмöдiсны сёрöн. Сетiсны кö водзджык, эськö ворсанiн-ёнмöдчанiн вöчим помöдз, — сёрнитiс котырö пырысь Т.Н.Нестерова.
Йöз ас окота серти чукöртiсны содтöд сьöм, кодöс веськöдiсны трактор медалöм, лампаяс ньöбöм, солярка да мукöдтор вылö. Югзисны нин уличьяс. Йöз петавлiсны уджыштны кортöг да тшöктытöг.
— Пятигорскын уна водзмöстчысь морт. Асвеськöдлан котыр лöсьöдöмöн да öтув уджалöмöн ми öтувтчим нöшта, сiйöн и вынаöсь. Дерт, эмöсь на сэтшöмъяс, кодъяс виччысьöны кысянькö отсöг либö олöны дасяс. Но эска, мый и найö сюртчасны миян дорö. Выль во кöсъям вочаавны ас вынъясöн вöчöм ворсанiнын. Öтув уджалiм, öтув и гажöдчам. Эм на мый вöчны водзö. Пятигорскын абу телефона йитöд. Та кузя шыöдчылi республикаысь Госсöветса юралысь Игорь Ковзель дорö. Воис письмö, гижöма, мыйта сувтас уджыс. Шыöдчи бара, мед телефон сюйöм пыртасны локтан вося бюджетö, — пасйис асвеськöдлан котырö пырысь Е.Д.Гичева.
— Таво овмöдчим выль керкаö. Буретш миян дортi лöсьöдiсны-бурмöдiсны туй. Котыртiс уджсö Артур верöсöй. Керка кыпöдiгöн туйсянь пыравлiм вöр пыр, тулысын-арын сьöкыд вöлi машинаöн вайны вöчасьöм вылö коланасö. Асвеськöдлан ко- тыр — тайö буртор. Позьö аслыным бурмöдны олöм, кор отсалö правительство. Пырöдчим районса конкурсö да вермим ёнмöдчанiн лöсьöдан балаöн. Кутам вöчны локтан воын. Пятигорск-ын уна челядь, уна том семья. Ёнмöдчанiн вöчöмöн дзоньвидза оласногö кутчысям ставöн, — сёрнитiс И.И.Кинаш.
Талун Пятигорскын 44 керка. 10 керка кызвыннас дась, но сэтчö эз на овмöдчыны. Таво выль керкаясö пырис вит семья. 2008 воын нюжöдiсны ва визь, кысянь олысьяс вайöдiс- ны керкаясöдз. Таво асвеськöдлан котыр вермис ичöт балаясöн районса конкурсын, вичмис 183620 шайт. Сы вылö вöчöдiсны да öшлiсны уличлöн нима да керка номера пасъяс. Петкöдчис и коммерциятöм котыръяслöн районса конкурсын, вермис, мыйысь вичмис 177450 шайт. Вöчöдiсны да сувтöдiсны Пятигорск пыранiнö «Видза корам!» гижöда ыджыд пас.
Пятигорскса асвеськöдлан котыр, кодлы локтан вося февральын тырас кык во, и водзö кöсйö пырöдчыны быдсяма конкурсö. Водзмöстчысь, зiль йöз вöчисны уна бур нин. Найö бура гöгöрвоöны, мый аскиа олöм ас сайын.
Марина ДАДАШОВА.
Гижысьлöн да Елена Гичевалöн снимокъяс вылын: Сосновая улич вылын бурмöдöм туй; ворсанiн.