Выль во водзын юрсиктса шогмытöм керкаясын олысьяслы усис шуд пырны выль керкаö, кытчö воöны шоныд да ва, эмöсь пусян плитаяс, ванна, ва шонтан, унитаз, да с.в. Декабр 16 лунö районса юралысь Д.А.Шатохин да «Кулöмдiн» овмöдчöминöн веськöдлысь С.В.Рубан налы сетiсны Луговая уличвывса керкалöн патераясысь ключьяс, вундiсны гöрд лента. Районса юралысь Д.А. Шатохин аттьöалiс «РемСтройСервис» котырöс, кодi кыпöдiс керкасö, райсöветса депутатъясöс, кодъяс юкисны сьöм, керка вöсна кывкутысьясöс.

— Федерациялöн «Шогмытöм оланiнысь выльлаö вуджöм» программа серти федерацияса бюджетысь вичмис 6 миллион 365 сюрс, республикасаысь 15 миллион 363 сюрс, районсаысь 11 миллион 964 юрс шайт. Аддзысьлiм нин юркарса веськöдлан котыркöд, кодi дась босьтны керкасö куимнан юкöннас. Но öти керкаыд сылы этша. Котырын уджалысьяс воласны юрсиктö, аддзысь-ласны йöзкöд, висьталасны, кыдзи кутасны видзöдны патераяс бöрся. Чайта да, сюртчасны мукöд. Öтпырйö 16 выль патераö овмöдчöм — тайö районлы зэв ыджыд буртор, — висьталiс Д.А. Шатохин.
С.В.Рубан корис олысьясöс чукöртчывны, мöвпыштны да бöрйыны, кодi кутас тöждысьны керка вöсна, öтув сöстöма видзны пыранiн, öшинь ув. Танi жö овмöдчöминса специалист вöчис быд олыськöд со-циальнöя кöртымалöм йылысь сёрнитчöм. Выль оланiнö пырысьясöс тöдмöдiсны, кыдзи аслыныс видзöдны да лöсьöдны колана шоныд.
— Пыр на оз эскыссьы, мый вичмис татшöм бур оланiн. 1981 воын Верхне-Вычегодскöй леспромхоз, кöнi уджавлiс верöс, сетлiс Ленин нима улич вылын керкаысь патера. Подувсö вöчлiсны лёка да керкалöн стенъяс, джоджъяс регыдöн вежыньтчисны, пачьяс помся киссисны. Мырсим-олiм 30 во, бöръя кык восö дача вылын. Миянлы, пенсионеръяслы, тайö ыджыд шуд. Патераыс шоныд. Оз ков ва ни пес. Аттьö олысьяс вöсна тöждысьысьяслы, — нимкодясис С.И.Ветошкина.
— Ми во вит нин ог олöй Ленин нима уличвывса керкаын. Бать-мам кыпöдiсны ас керка. Ме кад кежлö мунi уджавны Вуктылö, сэнi кöртымалi оланiн. Эг эскы, мый миянлы вичмас бур патера. Меным, Елена гöтырлы да кöкъя-мыс тöлысся Глеблы тайö Выль вося зэв ыджыд козин, — выль патераын сёрнитiс И.С.Солтусенко.
— Зэв бур, мый ми веськалiм «Шогмытöм оланiнысь выльлаö вуджöм» программаö. Эг виччысьöй, мый кыпöдасны öдйö. Кыпыд, югыд, шоныд жыръяс, эм став коланаыс. Аттьö ставныслы, — висьталiс Н.В.Скульская.
— Выль патераö пырам выль мебельöн. 28 во олiм Кочанов нима уличвывса керкаын, кодöс сетлiс «Сельхозхимия». Нюринö кыпöдлiсны да подув дзикöдз нин пырис муас. Дöмлiм-дзоньталiм, но керка пыр киссис-вежыньтчис. Зэв нимкодь, мый район сöвмö, кыпалöны выль керкаяс, — нимкодясис Н.В. Торлопов.
— Миян семьялы сетлiсны патера Ленин нима улич вылын, кодi лоис шогмытöмöн. Ломтан-ломтан, а жыръяс оз шонавны. Уджавны да овны ветлi карö, вуджи уна сьöкыд. И со Выль во кежлö татшöм бур козин. Тöдмасям выль олысьяскöд, öтувтчам, тулысын пелькöдам-сöстöммöдам öшинь ув, керка йöр. Вöчам ставсö, мед гöгöр вöлi кыпыд, — аскиа олöм йылысь нин мöвпалiс Н.И. Касева.
Пасъям, 16 патера пиысь кыкыс служебнöй. Öтисö сетiсны шöр бурдöдчанiнлы, мöдсö райадминистрациялы.
Марина ДАДАШОВА.