Вöлiны и миян районсаяс. Россия Федерацияса видз-му овмöс министерство уна вося бур уджысь аттьöалан гижöдöн пасйис «Помöсдiн» кооперативлöн правлениеöн веськöдлысь Татьяна Владимировна Уляшёваöс, республикаса Госсöвет — Кулöмдiнысь крестьянин овмöс кутысь Ольга Борисовна Ракинаöс. «Республика водзын заслугаясысь» пас вичмис Кулöмдiнса ПМК-öн веськöдлысь Василий Михайлович Тарабукинлы.

Татьяна Владимировна Уляшёва медводз вöлi «Помоздинскöй» совхозын бухгалтерöн, бöрынджык дыр веськöдлiс урчитанторъяс юкöнöн, 2011 восянь веськöдлö «Помöсдiн» кооперативлöн правлениеöн. Сылöн ёна зiльöмöн 2013 воын воссис йöлысь вöлöга вöчанiн. Йöв, сыр, вый кындзи босьтчисны вöчны кефир да йогурт. Быд пекничаö вöлöгаöн петкöдчöны Кулöмдiнын видз-му овмöс ярмарка вылын. Ветлывлöны Сыктывкарö, Эжваö, Мылдiнö. Кооператив босьтö йöв ас овмöсъясысь. Лöсьöдiсны кöрым заптан выль техника, кольöм восянь выльмöдöны Скöрöдумса скöт карта. Талун кооперативын лысьтан 270 мöс, 240 ялавич.
Ольга Борисовна Ракина нуöдö батьыслысь, кодi медводдзаяс лыдын лöсьöдiс крестьянин овмöс, туйвизь,«нопсö» босьтiс аслас сьылi вылö 2006 воын. Парма грездын, кöнi аньлöн овмöсыс, уджалöны ас районса йöз. Тöв и гожöм тöждысьö туй вöсна. Ольга Борисовналöн 25 мöс (15-ыс лысьтан), 80 гöгöр порсь. Овмöс могмöдö йöлöн да яйöн бюджетса котыръясöс, вöлöгаöн вузасьö ярмарка вылын, порсьпиянöс вузалö ас овмöсъяслы. Октябр 17 лунö восьтiс начкысянiн. Кутас начкыны скöтöс кыдзи ассьыс, сiдзи и кооперативъяслысь, крестьянин да ас овмöсъяслысь.
Анастасия ЯРОВА,
видз-му овмöс министерстволöн
районъяскостса юкöнысь начальник.