Содтыны лоис быть
Редакцияö ёнакодь звöнитчисны нянь вылö дон содтöм кузя. Миян корреспондент тöдмалiс, мыйла тадзи лоис.
Гожöм помын лунысь-лун содiс дон шыдöсъяс, пызь, кöнтусь вый да мукöд сёян-юан вылö. Лавкаясысь медся коланасö джаджъяс вылысь быттьö чышкыштлiсны. Выль вайöмлöн вöлi выль дон, воддзасьыс ыджыдджык. Кутшöмсюрö вузасянiнъясын арсянь донсялiс и нянь. Йöз шызисны. Гöгöрвоана, пызан сайö няньтöг он пуксьы. Да и важ йöз велöдлiсны: няньтöг эн пет туйö, эн мун вöрö. Нянь ― быдлунъя сёян.
Кулöмдiнса нянь пöжаланiнын сьöд нянь вöлi 26, а еджыд 28 шайта. Ноябрсянь сьöд комыналiс, а еджыд лоис 32 шайта.
— Кулöмдiнса нянь пöжаланiнлысь нянь вылö дон кыпöдöмын некутшöм торкалöмъяс эз аддзы республикаса антимонопольнöй служба. Сэтчö мöдöдлiм кольöм вося, квартался да бöръя тöлысьясся (июль, август, сентябр) нянь пöжалöм кузя туялöм. Пасйим, уна-ö пызь да нянь артмöданторъяс мунiсны пöжалöм вылö, мыйта видзим би, ва, пес, уна-ö нянь пöжалiм, уна-ö вештiм вот, мыйта сьöм мунiс удждон, роспотребнадзорлöн услугаяс да мукöдтор вылö. Бöръя восö Кулöмдiнса нянь пöжаланiн эз кыпöдлы нянь вылö дон. Сэкжö августсянь пызь вылö дон содiс пöшти джынвыйö. Тадзи лоис бытьысь вöчны, — висьталiс видз-му овмöс министерствоысь районлöн юкöнса начальник Анастасия Ревокатовна Ярова.
Ноябрсянь нянь донсялiс и «Усть-Немторг» котырын, кöнi пöжалöны нянь да иналöны Югыдъягса да Белоборскса лавкаясын. Сьöд нянь вöлi 21, лоис 27 шайта.
— Пызь шöркодя содiс 20 процент вылö. Кыпалiс дон бензин, коммунальнöй услугаясöн да биöн вöдитчöмысь. Экономика сöвмöдöм кузя министерство миянлы, кыдзи ылi сиктса предпринимательяслы, отсалö, вештыштö машинаöн вайöм-нуöм. Югыдъягсянь öти ветлöмысь арталö 164 километр, Белоборсксянь — 114. А öтчыд ветлöмöн öтарö мунöмыс артмö 260 километр, а нöшта кытшлалам юркарса базаястi. Налöн арталöм да вештöм серти миян тöвар воö сöмын Кулöмдiнöдз. Ставыс донсялiс да нянь вылö дон ковмис кыпöдны быть, — висьталiс «Усть-Немторг» котырöн веськöдлысь Любовь Ивановна Булышева.
Смолянкаса предприниматель Нина Егоровна Ивановалöн эм нянь пöжаланiн. Пöжас вузавлö Смолянкаса лавкаын, няньöн могмöдö посёлокса школа да сад. Таво Югыдъягса Ягъюрын восьтiс лавка, кöнi джаджъяс вылын пыр ас нянь. Быд лун 15 тупöсь босьтö и Югыдъягса школа. Тöлысьöн öтчыд нянь нуö Канаваö.
— Дон содiс пызь вылö, донсялiсны бензин да уна мукöдтор. Кольöм вося апрельын нянь вылö дон кыпöдыштлiм муртса. Сьöд тупöсь вöлi 21, а еджыд 23 шайта. Тавося ноябрын быть лоис содтыны. Сьöд лоис 24, еджыд 27 шайта. Кольöм во экономика сöвмöдöм кузя министерствоöн сетöм отсöгöн, кыдзи ылi сиктса предприниматель, вöдитчи, таво дугöдчи. Тавосянь сiйöс лыддьöны оз транспорт рöскодысь сьöм бергöдöмöн, а сьöм воöмöн. Сiдзкö, во помын меным колö вöчны декларация да нуны вот инспекцияö. Бумага уджыс сiдз юрвывтыр. Но, тыдалö, олысьяс гöгöрвоöны, мый гöгöр ставыс донсялö, да элясьöм-зыксьöм эз вöв, — пасйис Н.Е.Иванова.
Районын нянь пöжалöны 12 предприниматель да предприятие. Унджыкас нянь донсялiс нин. Выль восянь донсьöдыштны кöсйöны Кулöмдiнса сельпо, Нина Ивановна Зубко, «Барс» котыр.
Кодi быд лун пыравлö вузасянiнъясö, бура тöдö донъяс кузя серпас. Лыддьысьысьяслы тöдвылö: сёян-юан вылö дон вежсьöмъяс йылысь юöр босьтiм Комистатлöн сайт вылысь: «Ноябр 27 лунсян декабр 3 лунöдз донсялiсны ― сов 7,3, кöнтусь вый 3,2, чипан кольк 1,7-2, пызь, сакар, йöв, мöс вый 0,7-0,9 процент вылö».
Татшöм öдöн кö эськö содтiсны удждон либö пенсия.
Марина ДАДАШОВА