Вермысьяс лыдын и кулöмдiнса
Кольöм пекничаын «Помöсдiн» кооперативлöн «Миня шор» видз вылын мунiс мелиорацияса котыръясын уджалысьяслöн «Профессия серти медбур» республикаса конкурс, кодöс котыртiс да нуöдiс Сыктывкарса «Комимелиоводхоз» управление. Сыöн веськöдлысь Н.В.Юркинлöн висьталöм серти, бöръясьыс татшöм ордйысьöмсö нуöдлiсны 2002 воын Выльгортын да сöмын экскаваторъясöн уджалысьяс костын. Таво медводдзаысь вермасисны и бульдозерса машинистъяс. Петкöдчисны «Комимелиоводхоз» управлениеса, «Коймöд номера мехколонна», «Визинса МТС», «Кулöмдiнса ПМК» да Ухтаысь «Изваильский—97» котыръясысь механизаторъяс, ставыс 15 морт.
Найöс чолöмалiсны да бурсиисны районса юралысь Д.А.Шатохин, видз-му овмöс да сёян-юан кузя министрöс вежысь Э.А.Блох, райсöветса депутат М.А.Шомысов, «Комимелиоводхоз» управлениеöн веськöдлысь Н.В.Юркин да «Помöсдiн овмöдчöминса юралысь А.Е.Уляшёв.
Вермасисны кык юкöн серти. Экскаваторöн уджалысьяс ордйысисны выльпöлöс «Е 200-С» да важиник «МТП-71» вылын торйöн. Колiс босьтны кöшöн ичöтик брус да пуктыны индöм пас дорö кыдз позьö матöджык, а сiдзжö кодйыны канава. Бульдозерса машинистъяслы вынйöра техникаöн колiс мунны-чукльöдлыны пасъяс костöд водзöн и бöрöн, кульны эжа да шыльöдны му. Кöть вöлi ыркыд, машинистъяслы лоис пöсявмöныс, быдöн зiлис уджсö вöчны бурджыка да öдйöджык.

Бульдозерса машинистъяс пиысь вермис «Визинса МТС» котырысь Михаил Васильевич Пешкин. «Е 200-С» экскаваторса уджалысьяс пиысь медводзö петiс «Кулöмдiнса ПМК» котырысь Владимир Александрович Лодыгин (II), кодi кодйис канавасö урчитöм кадö коланаысь куим пöв уна. «МТП-71» экскаваторса машинистъяс пиысь медсюся уджалiс «Комимелиоводхоз» управлениелöн Сыктывдiн районса филиалысь Василий Егорович Костромин. Э.А.Блох чолöмалiс найöс да вичмöдiс дипломъяс да козинъяс. Посни козинъяс сетiс и мукöд петкöдчысьяслы. Вермысьясöс чолöмалiс сiдзжö районса администрацияöн веськöдлысьöс медводдза вежысь Е.А.Стяжкина да вичмöдiс козинъяс кыдзи налы, сiдзи и конкурс котыртысьяслы, а медся том петкöдчысьлы, Кулöмдiнысь В.А.Лодыгинлы, — районса юралысьсянь аттьöалан гижöд да сьöма сертификат.
-Кыдзи и артыштiм, ордйысьöм мунiс бура, — донъялiс конкурссö Н.В.Юркин. — Сiйöс колö нуöдны тшöкыдджыка. Зiлям выльмöдны техника, кольöм воын «Кулöмдiнса ПМК» котырлы босьтiм выль экскаватор, сiйöн уджалöны томъяс. Тайö лунъясö Москваысь республикаö воисны канава бокъяс ытшкан агрегатъяс.
Галина НЕСТЕРОВА.
Авторлöн снимокъяс вылын: Вермысьяс М.В.Пешкин, В.А.Лодыгин, В.Е.Костромин; канава кодйигöн; вочаалöны няньöн-солöн, донъялöны вöчöм удж.