— Мам — миян медся матысса да радейтана морт. Сiйö чöскыда пусьö и пöжасьö, пелькöдчö и песласьö — вöчö ставсö, мед ми олiм кыпыда, сöстöма да пöтöса. Кор лов вылын сьöкыд, кутыштлас сьöлöм бердас, малыштас юрöд — и став майшöгыд бырö, — öта-мöднысö панйöмöн висьталiсны Кулöмдiнысь Анна Николаевна Тимушевалöн Ксения да Светлана нывъясыс. Налöн дзоляник, арöса-джынйöна, чойыс, Лилия, гашкö, кöсйис мыйкö нöшта содтыны, но висьтавны эз на куж, мамсö кутлiс сöмын. Кöть батьныс, Пётр Анатольевич, гортас жö вöлi, но челядь ёнджык бергалiсны мамыс дорын. Нывъяслы, кодъяс асьныс коркö лоасны кöзяйкаясöн, колö быдторйö велöдчыны сылысь. Ксения, медыджыдыс, отсалö нин вöчны посни удж, видзны кага. Сы бöрся сюртчö и Светлана. Видзöдöмысь, чойяс öти сьöлöмöн олöны.
— Öтлаын вöчам урокъяс и ворсам. Дерт, керканым ичöтик, дзескыд, но челядьöн гажа, — оз майшась Анна Николаевна. — Коймöд кага вайöмысь вичмöдiсны мам капитал да республикасянь сьöма отсöг. Мöвпалам кыпöдны сы вылö керка, но тайö сьöмыс абу на тырмымöн. Кöть и асьным на уджалам —  ме садйын, верöс коммунхозын.
Но верöсыс векжö эскöдiс, мый лэптас выль оланiн, кутшöм кöть сьöкыд оз ло. Чайтам, мый кöсйöмныс збыльмас.