Мый вöчны, медым коммунальнöй услугаясысь вештыны этшаджык? Медводз, дерт, колö пуктыны би, ва, шоныд арталан счётчикъяс, медым мынтыны сöмын сыысь, мыйта видзинныд.
Медым этшаджык вештысьны электроэнергияысь, кыскöй розеткаясысь электроприборъяс, кодъяс оз ковны луннас да войнас. Тайö телевизор, компьютер, микроволновöй пач, электроплита да с.в. Лампочкаяс вочасöн вежöй электроэнергия видзтан вылö. Чышкалöй югзьöдан приборъяс вылысь бус. Электрочайник весалöй пуксьöм чорыдысь. Холодильник сувтöдöй пач да батареяяс дорысь ылöджык, эн пуктöй сэтчö шоныд сёян. Позьö пуктыны кык тарифа счётчик. Сiдз шусяна войся тариф, кодi мунö 11 час войсянь 7 час асылöдз, пöшти кык пöв донтöмджык лунсяысь. Тайö лöсялас налы, кодi войнас вöдитчö электричествоа приборъясöн.
Уна патераа керкаяслöн пыранiнъясö позьö гартны лампочкаяс, кодъяс асьныс öзйöны морт пыригöн, а мунöм бöрын регыд мысти кусöны асьныс.
Патераясысь шоныд медъёна «пышйö» öшиньяс да öдзöсъяс пыр. Эм кö позянлун, пуктöй пластикысь öшиньяс, абу кö — сюялöй костъяссö ватаöн, клеитöй бумагöн, öшöдöй топыд занавес, но сöмын мед сiйö эз тупкы шоныд сетан батарея. Батареяяс эн сиптöй нинöмöн. Ывлаö петан öдзöс бура поньталöй. Тайö ставсö аслас патераын вермас вöчны быдöн, а шоныд сетан система, оланныд кö уна патераа керкаын, гожöмнас колö пожъявны управляющöй компаниялы. Тайöс вöчтöг батареяяс кутасны шонтыны омöльджыка.
Вежöй либö дзоньталöй виялысь кранъяс. На вöсна суткиöн вермас мунны 100 гöгöр литра ва.
Овны кö видзтöмöн, во помын вермас чöжсьыны вель уна сьöм.
Юöрсö дасьтöма жилищно-коммунальнöй овмöс юкöнын йöзлысь правояс дорйöм кузя «Единая Россия» партияса Коми отделениелöн бала серти. Партиялöн «пöсь линия» телефон: 8 (8212) 29-35-22.