Со и помасисны Выль вося гажъяс, кодъяс вайисны Кулöмдiн районса тыр арлыдтöмъяслöн социально-реабилитационнöй шöринын олысь зонпоснилы уна нимкодь виччысьтöмтор: попечительяслöн сöветö пырысьяс да шöринлöн ёртъяс отсалiсны Кöдзыд пöльлы пöртны олöмö челядьлысь гуся кöсйöмторъяс.

Планшетъяс, телефонъяс, пультöн веськöдлан машинаяс, нывкаяслы баситчанторъяс, небыд чачаяс вайисны нывкаяслы да зонкаяслы уна нимкодьлун. Еджыд Лымчиръяс, лапъя пеля Понпияс, сапöга Кань, Пиратъяс йöктiсны коз гöгöр да сьылiсны, Кöдзыд пöлькöд да Драник канькöд öтув мездiсны Лым нылöс Ёма бабаысь да Вöрсаысь. Та бöрын Кöдзыд пöль козьналiс О.А.Алтуховсянь челядьлы юмовторъяс, а шöринлы — моноблок. Республикаса юралысь В.М.Гайзерöн да Кебанъёльысь ас вылö уджалысьясöн козьналöм юмовторъяс эз бырлыны челядьлöн пызанъяс вылысь праздникъяс чöж.
Челядьлы козинъяс сеталiсны районса администрацияöн веськöдлысьöс вежысь А.И.Федюнёва да райсöветса депутат А.А.Кузнецова.
Ыджыд аттьö челядьсянь да шöринса уджалысьяссянь попечительяслöн сöветö пырысьяслы: районса юралысь Д.А.Шатохинлы, Коми республикаысь промышленникъяслöн да предпринимательяслöн котырса президент О.А.Алтуховлы, «Россияса сбербанк» котырлöн Коми юкöнса 8617/068 содтöд офисöн веськöдлысь О.В.Еникеевалы, райсöветса депутат А.А.Кузнецовалы, а сiдзжö шöринкöд ёртасьысь ас вылö уджалысьяслы — Р.В.Третьяковлы, В.Н.Сметанинлы, И.В.Ракинлы, Р.А.Напшевалы, С.А.Цгоевлы.
Сьöлöмсянь чолöмалам челядьлы мойдкыв вöчысьясöс Выль воöн да сиам ыджыд шуд, кыпыд нюмъяс да мойвиöм!
Марина ЖОГЛО, шöринса педагог-психолог.