САЛДАТ ВОИС ГОРТАС
нкт-Петербургын Ко­ми республикаса представительствоö шыöдчис О.В.Константинова, кодi чужис Комиын да танi карас олö матö комын во нин. Корис отсавны корсьны гусö ыджыд мам­ыслöн вокыслысь, Кекурын чужлöм Иван Андреевич Уляшёвлысь, кодi юрсö пуктiс война дырйи Ленинград дорйигöн. Ачыс корсьысис уна во, но весьшöрö. Представительствосянь шыöдчисны Ленинград обласьтса военкоматö. Сэсянь вочавидзисны, мый война бöрын Анненское грезд дорын усьöм салдатъяслысь шойяс вуджöдiсны Кировск карса Краснофлотскöй улича вылö. Коми сал­датлысь ним пасйöма öтувъя гу вылö сувтöдöм пöв вылö.

Санкт-Петербургын Коми республикаса представительстволöн юкöнысь шöр специалист Ксе­ния Сергеевна Таскаева районö вайис Кировскса öтувъя гу вылысь, кöнi куйлö И.А.Уляшёв, вичкоын сьылöдöм му. Öти юкöн колис юрсиктö, медым пуктыны Великöй Отечественнöй вой­на вылын усьöмъяслöн пас дорö, öд Ленинград вöсна тышъясын Кулöмдiнысь олöмнысö сетiсны унаöн. Мöд юкöнсö нуас Габовö, кöнi регыд кы­пöдасны война вылын усьöмъяслы часовня, коймöдсö катöдiс Кекурö Иван Андреевич Уляшёвлöн чужанiнö. Ксения Сергеевнаöс да По­жöгса юралысь Н.А. Шаховаöс вочаалiсны фронтöвиклöн чойыс, Агния Андреевна Шахова, да сылöн нылыс, Надежда Николаевна.
Агния Андреевна син­ва сорöн казьтылiс:
— Бать-мам кувсисны водз да война пансигöн ми олiм куим чоя-вока: Наталья, Иван да ме. Ме вöлi вокысь ёна дзо­ля. Натальялöн висьта­лöм серти, сiйö помалiс нёль класс, велöдчис По­мöсдiнса МТС-ын трак­тористö да уджалiс кол­хозын. Вöлi латшкöсiник тушаа, зэв вежа­видзысь, рам морт. Фронт вылö мунiгöн сiйöс На­талья вöлöн колльöдiс Кулöмдiнöдз. Сэки Иванлы муртса тырис 18 арöс. Веськалiс Ленин­град фронтса танкöвöй полкö. Гортö гижлiс ге­жöдика. Тöждысис, ставыс-ö миян лючки-бур. Бöръя письмöсö гижöма ичöтик открытка вылö, пасйöма сöмын, мый дзоньвидза, сылöн ста­выс бур, уна гижны кад­ыс абу. Тöлысь мысти воис юöр, мый 1943 вося август 18 лунö юрсö пуктiс Ленинград об­ласьтлöн Мгинскöй районса Анненское грезд дорын мунысь ёсь тыш­ын. Помöсдiнысь Севö Алексей, кодкöд öтлаын веськалiсны фронт вылö, сёрöнджык казьтылiс, мый Иванлöн танкыс сылöн синъяс водзын веськалiс мина вылö да пасьнитчис, пытшкöссьыс некод петны эз вермы. Салдатъяслысь ко­ляссö чуöртiсны табак ящикö да гуалiсны сэтчöс грездö.
Санкт-Петербургысь вайöм вежöдöм му ну­исны Кекурса шойна вылö да пуктiсны Иван Андреевич Уляшёв батьлöн гукöд орччöн. Агния Андреевна шуис, мый сэтчö сувтöдасны крест. Пöся аттьöалiс К.С.Таскаеваöс ыджыд бур вöчöмысь. Тыдалö, сьöлöм вылас лоис лöсьыдджык, мый 70-ысь унджык во мысти вокыс, кодi олöмсö сетiс миян олöм вöсна, кöть нин му кабырöн воис чужанiнас. Позяс копыртчывны матыссаяслы и став рöдвужлы.
Галина НЕСТЕРОВА.
Авторлöн да Ксения Таскаевалöн снимокъяс вылын: И.А.Уляшёв; öтувъя гу вывса пöв вылын гижöд; Кировск карса шойна вылын обелиск; К.С.Таскаева сетö А.А.Шаховалы вежöдöм му; Кекурса шойна вылын.