Кулöмдiнын котыртлiсны му вылö пуктанторъясöн вузасьöм.
-Бара ньöби рöсада Вологжанинъяслысь. Пуктöм бöрын ставыс зэв бура босьтчö, ловзьö да воö. Ньöби дзоридзьяслысь да градвыв пуктаслысь рöсада. Гожöм-арын öшинь улöй мича, градвыв пуктасысь вöчöмторъяс сёям во гöгöр чöж. Зэв бур, мый позьö босьтны и яй да йöв, наысь вöчöм вöлöга. Татшöмсö колö котыртны тшöкыдджыка, — висьталiс Кулöмдiнысь З.А.Мартюшева.
-Рöсадаöн да кöйдысъясöн вузасьöм йылысь лыдди «Парма гор» газетысь. Ньöби дзоридз рöсада гортö и удж вылö. Вайöмаöсь выльпöлöс дзоридзьяс. Висьталiсны, кыдзи колö пуктыны найöс, дöзьöритны. Ме радейта мича öшинь ув, кöнi быдмöны унасикас дзоридзьяс. Татшöм вузасьöмсö колö котыртны тшöкыдджыка, — шуис олöмаяслöн да вермытöмъяслöн Зимстанса керкаöн веськöдлысь Е.В.Лодыгина.

-Ставыс öтилаын да нöшта сикт шöрын, мый зэв бур. Вузасим и ньöбасим, — пасйис «Пожöг» кооперативысь медшöр бухгалтер Л.М.Смирнова.
Со тадзи донъялiсны районса олысьяс пуктысян кадö кöйдысъясöн, рöсадаöн да вужйöдöм быдмöгъясöн медводдзаысь паськыда вузасьöм йылысь.
-Водзвыв юöртiм районса газетын, районса администрациялöн сайт вылын, кутшöм лунö, кодъяс локтасны да мыйöн вузасясны. Воисны Киров обласьтысь, Сыктывкарысь, Сыктывдiн районысь да ас районса, Ичöт Аныбысь М.Г.Вологжанинлöн крестьянин овмöс да Кулöмдiнысь «Семена» лавка. Нимкодь, мый ас районсаясöс виччысисны медся ёна, асывсяньыс вöлi öчеред. Мунiс лотерея, сьылiсны частушкаяс.Гажöдiсны культура керкаса уджалысьяс. Артмис гажа вузасьöм-ньöбасьöм, — висьталiс райадминистрацияысь экономика да вот юкöнöн веськöдлысь Ю.С.Малышева.
Вузасьысьясöс да ньöбасьысьясöс чолöмалiс да бурсиис районса юралысь Д.А.Шатохин. Почёт грамотаясöн, аттьöалан гижöдъясöн да козинъясöн пасйис районса садъясысь челядьöс, кодъяс серпасъясöн петкöдчисны «Град вылын бать-мам да ме» конкурсын. Медся бурöн шуис Пожöгысь Лилия Шаховалысь уджсö. Мöдöн лоис медводдза номера юрсиктса садйысь Анна Гордиенко да коймöдöн — Керчомъяысь Анастасия Булышева. Д.А.Шатохин пасйис и гаж дырйи частушкаяс медся бур сьылысь Л.Н.Вологжанинаöс да лотереяын вермысьясöс.
-Муяс вылö петiсны кооперативъяс, пуктысьöны и йöз. Тайö гажа вузасьöмсö котыртiс буретш пуктысян кадö, медым йöзлы лоис мый пуктыны. Мед тайö бурыс пырас миян олöмö, мед ньöбöмторъяс бура ловзясны, быдмасны да ставыс лоö уна, мед мичаöсь лоасны керка йöръяс, — бурсиис видз-му овмöс министерствоысь районлöн юкöнса начальник А.Р.Ярова.
Танi жö мунiс «Республикаöс сöвмöдан программа» кузя гöлöсуйтöм. Ньöбасьысьяслы, мунысь-локтысьяслы разöдiсны юöртан гижöдъяс, кодъясöн тöдмасисны, содталiсны мöвпъяс, вöзйöмъяс да гижöдсö чöвтiсны торъя ящикö.
Марина ДАДАШОВА.
Авторлöн снимокъяс вылын:«Семена» лавкаысь кöзяйка Т.В.Прокофьева вöзйö дзоридз рöсада; Л.Н.Вологжаниналöн и дзоридзьяслöн, и градвыв пуктаслöн рöсада;  вузасьö Сыктывкарысь ас вылö уджалысь О.Н.Рылова.