Тöдöй миянöс!

Август 18-öд лунö республикаса юралысь Владимир Викторович Уйба нимöдiс ыджыд вермöмъяс шедöдысь куим том мортöс, сетiс «Надежда Республики» пас. На лыдын вöлi и Вöльдiнысь Пётр Андреевич Непорожний.
Коми зон велöдчис Сыктывкарса автомеханическöй техникумын, «технология лесозаготовок» юкöнын. Студентъяслöн котырöн веськöдлысь Андрей Владимирович Столяров сюся видзöдiс быдöн бöрся, окотапырысь-ö велöдчöны, кодлöн кутшöм сям, кыскö-ö техника дорö. Да 18 мортысь бöрйис медся зiль да сюсьöс, Пётр Непорожнийöс, 2020-öд воын «Том профессионалъяс» конкурсын петкöдчöм могысь. И эз сорсьы. «Ремонт и обслуживание грузовой техники» нимпасын том морт республикаса велöдчанiнъясысь пырöдчысьяс пöвстысь лоис медся бурöн, сямöн да тöдöмлунöн ордйысис и Ульяновскын. 2021-öд воын автомобилистлöн лун кежлö «Том профессионалъяс» ордйысьöмын Пётр техникумса велöдысьяскöд нин ачыс донъялiс петкöдчысьясöс. Коймöд во велöдчигöн ыстылiсны Мурманскö войвылын уджсикасъяслöн «Том профессионалъяс» ордйысьöм вылö. Сэнi босьтiс коймöд места.
Таво томъяслы сиöм воын «БурТруд» бала серти медводдзаысь нуöдiсны «ПрофПерегрузка» конкурс. Республика пасьтаысь велöдчанiн медбур помалысь ним шедöдны окотитiс 30 морт. Но бöрйисны медся буръяссö, тшöтш и Пётр Непорожнийöс, пасйисны медводдза тшупöда дипломöн. Аттьöалан гижöд сетiсны и велöдысь А.В.Столяровлы. Чолöмалiс, ордйысьöмъяслысь тöдчанлун йылысь висьталiс, сиис шедöдны и водзö ыджыд вермöмъяс удж, уджöн могмöдöм да социальнöя доръян министр Е.Г.Грибкова.
Талун Пётр уджалö Пузлаын «Комилесбизнес» котырын.
— Велöдчыны мунтöдз нин тöдi, мый бергöдча чужанiнö. Кыйся-вöрала да мöдлаö мунöм йылысь весиг эг мöвпав. Тулыснас шыöдчылi Александр Светозарович Игнатов дорö, со и корис. 15 лун уджала, сы мында жö шойчча. Шыöдчöны, да прöст кадö дзоньтала техника и ёртъяслысь, и асшöр уджалысьяслысь, и сиктсаяслысь. Арнас муна армияö, локта да уджысь орöдчывтöг мöвпала босьтöм специальносьт серти велöдчыны и водзö, — сёрнитiс Пётр Андреевич.
Марина Дадашова.
Снимок «Вöльдiн» администрациялöн сайт вылысь.