…Воим сэтчöдз, мый оланiнъясын и дорас медыджыднас лоис шöйтысь пон, а сэсся нин сэнi олысьясыс приложение пыдди. И ми пинь мурчкöмöн тайöс терпитам и нинöм вöчны ог вермöй сы вöсна, мый федерацияса оланпас сертинайöс бырöдны оз позь. Тайö мытшöдсö выныштчöны вöрзьöдны места вывсьыс Россияса политикъяс 1999-öд восянь. Выль законодательствосö вöлi пыртöма парламентö 2011-öд воын. Куйлiс сэнi 2016 воöдз, кытчöдз президент эз тойышт сiйöс выльысь видлалöм вылö. Та бöрын вöлi нуöдöма 100 совещание, кабалаас пыртöма 300 сайö вежсьöм, сёрнитчöма 28 ведомствокöд и сöмын та бöрын 2018-öд воын федерацияса законын 498 номерöн вынсьöдöма «Об ответственном обращении с животными и о внесении изменений в отдельные законодательные акты РФ», кодöс примитöма 2018-öд вося декабр 27-öд лунö сьöдöн еджыд вылö пасйöма — шöйтысь понъясöс бырöдны оз позь, тайöн лоö торкöма сöвмöдана туй дзоньвидза мывкыда котырлы. Но öд став оланпасыс гижсьö и вынсьöдсьö: ставыс йöзлы, ставыс налöн бур олöм вöсна пас улын. Тайö жö кутшöм юрöн да та мындаысь чукöртчывлöм бöрын вынсьöдны оланпассö, медым ывла вылö петавлыны эз позь тайö увтчысь курччасьысь чукöр вöснаыс? Мыйкö бурсö вайис сiйö йöзыслы кык вонас? Да розя грöш дон нинöм. Нöшта на найöс куталöмыс, бурдöдöмыс, чипируйтöмыс, видзöмыс, вердöм-юкталöмыс, а сэсся бöр сэтчö лэдзöмыс, кытысь и тшапкисны эргысьöс, мый дон сувтö. Чипируйтöны, буди, сы могысь, медым кокниджыка аддзыны мöдысь-коймöдысь сiйöс тшапкигöн 15 сутки кежлö йöршитöм могысь. А кодзöм-тыртöммöдöм бöрад чайтанныд бырö сылöн лёклуныс да киссьöны ёсь пиньясыс? Öти понсö кутöмыс да видзыштöмыс сувтö 11 сюрс гöгöр, а татшöмыс кö 200? Арталöй, мый дон каттьö. Ме босьтi сöмын öти район. А кымын татшöмыс республикаын, Россияын? Добра вылö кö мунiс та ыджда сьöмыс, и сёрниыс абу. Но кодi видзöдö тайö сьöм инасьöм бöрсяыс и мый сэн вöчсьö «собачникъясас»? Бумага вылад унатор позьö гижны — сiйö терпитас. Но öд сьöмыс мунö миян зептысь. Сiйö вот мынтысьяслöн. «Манна небесная» моз сiдз-тадз оз киссьы вылiсянь… 
Дзоньнас гижöдсö лыддьöй январ дас нёльöд лунся газетысь. 
Владимир Шомысов.