Бергöдчис районö

 Медводза велöдысь — кыдз мöд мам. Мыйта кад, вын сiйö пуктö, медым ичöт нывка да зонкаясысь быдмисны шань, зiль, тöлка да шуда йöз. Быд лун велöдысь тöждысьö челядь вöсна, лöсьöдö урокъяс, медым эськö ставлы вöлi гöгöрвоана. Нимкодясьö, кор ныв-зонкаяс бура велöдчöны да накöд жö öттшöтш шогсьö, кор мыйкö оз артмы.

 Таво Виктория Валерьевна Липина гöрд дипломöн помалiс Сыктывкарса И.А.Куратов нима гуманитарнöй педколледж да локтiс уджавны Кулöмдiнса школаö. Кутас велöдны ичöт классъяс. Чужис да быдмис Ярашъюын.

 — Школаын велöдчигöн кажитчö вöлi история да физкультура. Урокъяс бöрын ветлöдлi ворсны баскетболысь. Асланым котыркöд пырöдчылiм и районса, и республикаса ордйысьöмъясö, вöлiм вермысьяс лыдын. Кöсйи лоны физкультура велöдысьöн, но кор воис экзамен кад, ыджыдалiс коронавирус. Колiс гортын снимайтны видео вылö кыдзи кужа вöчны упражненньöяс, но менам татшöм позянлуныс эз вöв. Сы вöсна эг вермы веськавны кытчö кöсйи. А история велöдысьö босьтöны сöмын вузö 11 класс помалöм бöрын. Медым помавны 11 класс, колö ветлöдлыны Пожöгö либö Помöсдiнö. Эг кöсйы мöд сиктын велöдчыны. Мöдöдi документъяс Сыктывкарса педколледжö ичöт класса челядьöс велöдысьö да воспитательö велöдан юкöнъясö. Баллъяс серти веськалi кыкнанас, но бöрйи да мунi велöдысьö, — висьталiс Виктория Валерьевна.

 Колледжын велöдчигöн мöдöд восянь нывъяс ветлiсны практика вылö карса школаясö. Медводз нуöдiсны класснöй часъяс. Коймöд вонас велöдiсны нин, тшöтш и вермытöм челядьлы школаясын.

Прöст кадö Виктория ветлöдлiс Коми культура шöринö, петкöдчис уна нуöданторъясын. Конкурсъяс вылын лыддис коми кыв вылын кывбуръяс.
Диплом босьтöм бöрын муса зонмыскöд мöвпалiсны, колльчыны карö либö мунны сиктö? Бöрйисны Кулöмдiн. Верöспуыс Кулöмдiнысь ньöбис керка, а Викториялы нывъёртыс висьталiс, мый школаö колö велöдысь.

 — Сетiсны 24 челядя медся ыджыд класс. Кута зiльны. Эска, мый ставыс артмас, — кывкöрталiс том специалист.
Нöшта Виктория Валерьевна тавосянь уджысь орöдчывтöг кутас велöдчыны Сыктывкарса госуниверситетын.
Наталья Тимушева.
Снимок гижысьлöн.