Кулöмдiнса медводдза номера садикын уджалысьяс «Ас сиктса енбиа войтыр» уджтасöн тöдмöдöны садйö волысьясöс сиктса енбиа войтыркöд. Гортаныс кагульничаяс быдöн мыйкö да мыйкö радейтöны вöчны ас киöн — кодкö кысьö, кодкö вурсьö, кодкö вышывайтчö бисерöн да алмаз мозаика тэчö…

— Тасянь ставыс и заводитчис, — висьталiс старшöй воспитатель Елена Дмитриевна Гичева, — педсöвет вылын пукалiм и думайтiм, кыдзи ми эськö вермам челядьöс, бать-мамöс, уджалысьясöс, гöстьясöс тöдмöдны енбиа йöзкöд? Öти мыйкö вöзйис, мöд, сiдзи и чужис миян садйын енбиа йöзлысь кужöмлунсö петкöдлан уджтасным. Татшöмыс Кулöмдiн районын зэв уна: снимайтны радейтысьяс, кипом удж вöчысьяс, серпасасьысьяс да мукöд. И ставныс ас гöгöрным: мам-бать, пöль-пöч, ыджыд мам-ыджыд бать. Некодöс огö öтдортöй, ставныслысь петкöдлам сьöлöмсянь вöчöм уджъяссö. Петкöдланторъяслы пыранiнö индiм торъя места. Уна мичатор да выльтор позьö сэтысь аддзывны. Челядьлы ёна кажитчö видлавны аслыспöлöс серпасъяс, чачаяс, кыöм кöлуй да став вöзйöмасö. Вежон-кык мунö выставкаыс, сэсся вежам выль вылö. Кодöс петкöдлыны, пыр сюрö. Тайö вежонас миян енбиа пельöсын Наталья Анатольевна Левченколöн уджъясыс.
Алёна Ермакова.
Гижысьлöн снимокъяс вылын Н.А.Левченколöн уджъяс.