[ A+ ] /[ A- ]

БЕРГÖДЧЫНЫ РАЙОНЛАНЬ ЧУЖÖМБАНÖН

«Парма гор» газетын (июль 7 лунся номер, «Комиинформлöн» «Чинтыны 10 воöдз» гижöд) ми юöртлìм нин, кыдзи сёрнитìс Коми республикаса общественнöй палатаын «Монди СЛПК» компаниякöд йитöдъяс лöсьöдöм йылысь «Кулöмдìн» муниципальнöй районса администрацияысь удж котыртан юкöнöн веськöдлысь, «Коми войтырлöн» районса представительствоöн веськöдлысьöс вежысь Надежда Васильевна РУСИНОВА. Талун сылысь сёрнисö сетам ставнас.

«Коми войтырлöн» районса представительство кутö «Монди СЛПК» компанияöн веськöдлысьяскöд топыд йитöдъяс. Вöлì öтувъя некымын аддзысьлöм, «гöгрöс пызан», на лыдын районса администрацияö пырысьяскöд, райсöветса депутатъяскöд, вöр лэдзысь предпринимательяскöд. Майшöдланаторъяс йылысь сёрнитìгöн вöлìны да шуисны ассьыныс кыв республикаса правительствоö да Госсöветö пырысьяс. Тавося апрельын представительствоö пырысьяс вöлìны сёрни вылын, кодöс котыртлìс «Эзысь парма» фонд. «Мондиöн» вöр лэдзöм да йöзöс уджöн могмöдöм йылысь сёрни вöлì и 2011 вося ноябрын коми войтырлöн районын да 2012 вося февральын юркарын чукöртчылìгъясöн.

Быд аддзысьлöм бöрын вöлì вöзйöма мöвпъяс, кыдзи корсьны петан туйяс, да вайöдöма наöдз, кодъяслы колìс пöртны олöмö вöзйöмторъяс. Но збыльвылас пöшти нинöм абу вöчöма. Дыр-ö позьö сöмын кöсйысьны, лоасны-ö бурланьö вежсьöмъяс?

Вайöда öткымын лыдпасъяс. Кулöмдìн район вöрлöн мында серти босьтö республикаын мöдöд места. Быд во позьö пöрöдны 4 миллион кубометр вöр, сы лыдын «Мондилы» — 1 миллион 996 сюрс кубометр. Быд во «Монди» социально-экономическöй ёртасьöм кузя договор серти сетö районлы сьöм (2012 воын — 8 миллион шайт). Кытчö мунö тайö сьöмыс, тöдöны районса олысьяс.

Нöшта öтчыд тöдчöда «гöрöдъяс», кодъясöс позьö разьны сöмын Госсöветлöн да правительстволöн отсöгöн. Медыджыд «гöрöдыс» сыын, мый урчитöм мында вöр оз пöрöдны, мöдарö, чинтысьöны да чинтöны уджалысь йöзлысь лыд. Петан туйыс эм. Ичöт да шöр бизнеслöн котыръяслы пöдрад серти пöрöдны вöр колö сетны «лöсялан» дон серти. Предприятиеяслы, кодъяс уджалöны «Мондиöн» кöртымалöм вöрын, колö вештыны физическöй лицояс вылö вот Кулöмдìн районын.

Мöд ыджыд майшöг сыын, мый районын зэв лёкöсь туйяс да посъяс, кытì кыскöны вöр. Медым серпасыс вежсис бурланьö, колö туйяс да посъяс дзоньталöм да дöзьöритöм вылö «Мондисянь» этша вылö быд во 50 миллион шайт. «Мондилы», «Кулöмдìн» муниципальнöй районлöн администрациялы да республикаса туй агентстволы колö кырымавны туйяс вöчöм кузя сёрнитчöм.

Зэв ыджыд майшöг сыысь, мый «Монди» чинтö уджалысьясöс. Колö лöсьöдны программа, медым отсавны удж вылысь мездöм мортлы котыртны асшöр делö, сетны этша вылö 300 сюрс шайт. Сìдзжö могмöдны уджöн найöс, кодъяс велöдчисны выль пöв.

Миян районын вöр лэдзан техника вылын уджалысьясöс дасьтö 15 номера Сыктывкарса училищелöн филиал. Найöс оз босьтны удж вылö, сы вöсна мый абу уджалан опыт. Колö, медым «Мондилöн» котыръясö босьтìсны стажируйтчыны филиал помалысьясöс, а сэсся примитìсны удж вылö. Та могысь колö кырымавны «Монди» да Кебанъёльса филиал костын сёрнитчöм.

Нöшта падмöдö сìйö, мый ичöт да шöр бизнеслöн котыръяслы оз лöсявны субподряд серти вöр участокъяс босьтöм могысь условиеяс. Колö кырымавны договоръяс этша вылö 10 во кежлö. Кырымавны найöс районса котыръяскöд, кырымавны сёрнитчöмъяс меставывса администрацияясöс пыртöмöн.

Абу бур сìйö, мый дугдìсны сетны дон босьттöг пес бюджетлöн котыръяслы да йöзлы. Колö лöсьöдны та кузя сёрнитчöм водзö вылö. Кокньöдöн сетны вöр ветеранъяслы, кодъяс уджавлìсны «Мондилöн» котыръясын.

«Монди» омöля тöждысьö вöр лэдзан посёлокъяслöн социальнöй юкöн вöсна. Та вылö колö содтыны сьöм.

Коми войтырлöн районса чукöртчылöм вылын примитöм кывкöртöдын (вöлì 2011 вося ноябр 22 лунö) медводдзаысь пыртìсны «Монди СЛПК» дорö корöмъяс. Гижöдыс вöлì татшöм: конференция сувтö «Монди СЛПК» компанияöн аслас вöр лэдзан котыръяслысь уджсö дугöдöмлы паныд да вöзйö «Монди СЛПК»-лы татшöмторъяс:

1. Кольны «Монди СЛПК-лöн вöрса компаниялысь» филиалъяс, а сìдзжö отсавны удж корсьöмöн, велöдöмöн да выль пöв велöдöмöн удж вылысь мездöмъяслы.

2. Вайöдны колана выйöдз Кулöмдìн — Керчомъя — Гайны туй вылын ордйöдан туйяс, а сìдзжö лöсьöдны татшöм туйсö Ягкöдж гöгöр.

3. «Кулöмдìн» муниципальнöй районкöд социально-экономическöй ёртасьöм кузя сёрнитчöм подув вылын урчитны Канава — Белоборск туй вылын Ындìн-1 да Ындìн-2 выль посъяс вöчöм.

4. Содтыны районкöд социально-экономическöя ёртасьöм кузя сьöма отсöг.

5. Районса администрациякöд да туй агентствокöд öтув Мыс дорысь понтон вуджöдны районлы дон босьттöг.

«Коми войтырлöн» районса представительство кутö лача, мый «Мон-ди СЛПК» водзö уджалас районын, но татчöс войтырлысь корöмъяс да тöждъяс тöдвылö босьтöмöн.

Комментарии:

Комментарии запрещены.

Свежий выпуск: 28 марта

Осторожно — мошенники!