НЫВБАБАЛÖН АНЬТУЙÖН

— Майбырöй, Фросюкöй, луншöра лунын шондì улас сэтшöм чöскыда узян. Меным эськö тадзи, да некор тай-а, — узьысь порськöд сёрнитìс ань, а мöдыс синсö лапнитлìс, кокъяссö легнитìс да рукöстыштìс. Шуöны тай, пемöсыд пö зэв бура гöгöрвоö кöзяинъяссö.

— Коньö, коньö! Волы, петкöдчывлы гöсьтъяслы, кутшöм тэ мичаник. Эн пов, эн пов, — корис куканьöс, кодì надзöникöн матыстчис, бöрсяньыс локтìс и мöд кукань.

Уджалìгöн да овмöс кытшовтìгöн аслас быдтасъяскöд тадзи век сёрнитö Ичöт Аныбысь «Рассвет» крестьянин овмöс кутысь Люция Николаевна Вологжанина.

Ичöт Аныбын, мöд ногöн кö, Öлекын, кольöм нэмын вöлì 28 овмöс, весиг Енлы эскысьяслы воланìн. Танì и чужлìс да быдмис Л.Н.Вологжанина. Деревнялöн «кулöм» бöрын нин, 1991 вося майын, Люция Николаевна верöсыскöд, Михаил Григорьевичкöд, танì лöсьöдìсны крестьянин овмöс.

— Мöвпыс вöлì верöслöн, кодì и босьтìс ас вылас тайö «нопсö». Ми öтлаын велöдчим техникумын агрономö. Ме водзö мунì Кировса институтö, а сìйö Ивановосаö. Тыдалö, невестаöс корсьны ветлìс, сэнì öд найö унаöсь. Миян институтын, сöмын мöд факультетын, велöдчис вокыс, код дорö волывлìгöн кежавлìс ме дорö. Со и воим öтлаасьöмöдз, — висьталìс нюмъялöмöн Люция Николаевна.

Велöдчöм бöрын гозъяöс мöдöдìсны Косланö. Куим во мысти локтìсны Ручö. Кор кутìсны котыртчыны крестьянин овмöсъяс, шуисны петны «ас нянь вылö». Босьтìсны кöртымö совхозлысь Öлекса муяс, сылысь жö сизим ялавичöс. Уджавны аскöд ышöдìсны рöдвужöс. Совхоз пай серти сетìс кык трактор. Нöшта трактор да сваритчан агрегат босьтìсны агроснаблöн фирмаысь. Сэсся öти трак-тор ньöбисны кредитöн. 20 юр вылö кыпöдìсны скöт карта, гараж, лöсьöдìсны пилорама, картупель видзанìн. Мöсъяс кындзи видзисны и порсьясöс да ыжъясöс. Вöдитìсны и градвыв пуктас. Бергалìсны-сöвмисны. Вöлì сьöкыд кад, но эновтчöм йылысь мöвп эз чужлы. Йöлöн да яйöн, капустаöн, свеклööн, морковöн пыр могмöдìсны районсаясöс. 2004 воын 50 юр вылö кыпöдìсны выль карта. Ылì грездын уджалысьясöс волìсны видзöдлыны унаöн, тшöтш и чина йöз. 1994 воын вöчисны зэв бур туй, кытì Öлекö позьö воöдчыны во гöгöр чöж. 2005 воын, кор Ручса олысьяс Михаил Григорьевичöс бöрйисны юралысьöн, овмöсöн босьтчис веськöдлыны гöтырыс.

Талун овмöсын 13 мöс, öти вöв, 15 порсь, ыжъяс. Вöдитöны картупель да унапöлöс градвыв пуктас. Кык ыджыд теплица. Медводз сэтчö пуктöны капусталысь да дзоридзьяслысь рöсада, тулыснас вузасьöны Кулöмдìнын. Найöс пыр виччысьöны да зэв уна ньöбöны. Капуста да дзоридзьяс местаö сэсся пуктöны öгурцы да помидор.

— Öгурцы да помидор быдтам аслыным. Вердам и уджалысьясöс. Кольöм воын капустасö босьтлìм 100 кымын мешöк, 60-сö вузалìм, — шуис Л.Н.Вологжанина.

— Кольöм воын картупель воис омöля, сёйисны ыжъяс. Потшöсъяс важмöны, а ыжлöн кö юрыс тöрö, пырö нин. Кольöм воын öти му вылысь весиг ёгсö эг нетшкöй, гашкö, мися, оз пакöститчыны. Но эз отсав: ёг сулалаö, а картупель абу, — содтìс М.Г.Вологжанин.

— 40 юрöдз вайöдлìм да бöр чинтысим, некытчö инавны вурунсö, — водзö висьталìс ань. — Гын сапöг вöчан Выльгортса фабрикаö эськö босьтöны, но зэв донтöма. Районса олысьясыд босьтöны этшаник.

Овмöсын эм пусянìн да нуръясянìн, кöнì куимысь лун сёйöны уджалысьяс. Мудз веськöдöны пывсянын.

Öлекын, Аныб юлöн кыр йылын, куим во дорвыв велöдчисны-шойччисны районса том дорйысьяс. Вологжанинъяс вöчисны налы лэбув, кыпöдìсны пывсян. Челядь олìсны палаткаясын. Отсасисны и овмöслы. Роспотребнадзорлöн öнìя корöмъяс серти танì челядьöс видзны оз позь, и лагерсö сэсся оз котыртны. Кыпöдìсны гöсьтъяслы оланìн, кытчö тöрö 30 морт. Татчö волывлöны ветеранъяс, öти классын водзтì велöдчысьяс, пасйöны тшупöда пасъ-яс да с.в. Лэптöны керка, кöнì позяс узьны. Кöсйöны кыпöдны и пывсян. Ывла вылын гöгрöс пызан, ыджыд ворсанìн.

— Лагерыд öнì абу, но сìдзсö челядь волывлöны. Кольöм воын волìсны Кулöмдìнса школа-интернатысь, «Пожöма яг» турбазаын шойччысь челядь. Уджалìсны, бурпöт шойччисны, ворсìсны. Ме найöс чöсмöдлì йöла вöлöгаöн, яйöн. Ми некодöс ог бöрыньтöй, — пасйис Л.Н.Вологжанина.

Миян волìгöн Öлекын шойччис Сергей Александров — Анна Малевалöн, кодì танì овлìс, внук.

— Кольöм воын корлìсны Öлек артмöмсянь 265 во тыригкежлö. Сьöлöм вылö воис пöся вочаалöм, гаж котыртöм. Таво локтì бара, бурпöт шойччи куим лун. Мöд во вола семьяöн, — сёрнитìс карса гöсьт.

Менам мунìгöн нин овмöсö локтìс вына кöрыма мешöкъяс тыра машина.

— Видза оланныд! Но, кыдз воинныд миянöдз, кутшöм туйыс? Ёна мудзинныд? — вочаалìс Люция Николаевна. Зорöд чöвтысьяс эновтìсны вилаяс да уськöдчисны пырт-лысьны.

— Сёрнитчöм серти кöрым босьтам «Комиконтакт» да «Шыдöс» фирмаяслысь. Талун вайисны 58 мешöк. Тырмас тöлысь да джын. Кöрым да скöтöс видзöм да дöзьöритöм вылö сетöны субсидия, — мешöк лыд лыддигмоз сёрнитìс ань да кывкöртìс:

— Öнì кö пöсявлам, тöвнас шойччыштам.

Марина ДАДАШОВА.