РАЙОНЛÖН ЧУЖÖМБАН

* Таво чужис нин 229 кага — кольöм вося тайö жö кадын серти 24 кагаöн унджык. Медся уна кага чужис Кулöмдìнын, Помöсдìнын, Югыдъягын, Кебанъёльын, Улыс Вочын. Бöръяас 3 ань вайисны кык кагаöн.

Кассяна во вылö видзöдтöг, вöлì 47 кöлысь. Кулìс 261 морт — кольöм воын серти 11-öн этшаджык.

* Видзöдöм серти, районса олысьяслöн лоис унджык сьöм. Кольöм вося квайт тöлысьöн кö ГИБДД-лöн юкöн регистрируйтìс 413 машина, то таво — 505-öс. Эжвайывсаяс зìльöны ньöбны суйöрсайса машинаяс, кодъяслы колö этшаджык ломтас да мавтас, озджык жугласьны. Талун районын ставыс 14 сюрс 239 машина да мотоцикл. Артмö, мый машина эм быд мöдöд мортлöн.

* Москваса «Космос» гостиницаö чукöртчылìсны Россия пасьтаысь ичöт да шöр бизнесын уджалысьяс. 120 морт пиын вöлìны и миян районысь Алёна Павлиновна Напалкова да Надежда Егоровна Сладкоштиева. Екатеринбургысь «Перспектива» фондсянь налы сетìсны «За успехи развития предприятия» пызанвывса медаль. Мöд лунас А.П.Напалкова да Н.Е.Сладкоштиева тöдмасисны Москваса тöдчана местаясöн, вöлìны Госдумаын, аддзысьлìсны депутатъяскöд.

* Кулöмдìнса сельпо вужвыйöн дзоньталìс Кулöмдìнысь мöдöд номера вузасянìн. Öти тöлысьöн вежисны öдзöсъяс, öшиньяс, öтлаöдìсны сёян-юан да промышленнöй тöварöн вузасян юкöнъяс. Ывласянь эжисны сайдингöн, вевттисны профнастилöн.

Öнì выльмöдöны Кулöмдìнса кöкъямысöд номера вузасянìн, сэсся вуджасны Носимö.

* Пожöгын брускысь кыпöдìсны да вайöдìсны вевт улöдз лыжи база.

Та вылö районса администрация вичмöдìс 500 сюрс шайт. Уджалìсны сöмын шойччан лунъясö. Водзмöстчысьöн вöлì физкультура, спорт да туризм юкöнöн веськöдлысь Виктор Уляшов, отсасисны тренеръяс. Велöдчан воöдз эштöдасны.

* Районын 9333 пенсионер. Квайт тöлысьöн налöн лыдыс содìс 71 морт вылö. Содìс и пенсияныс. Январын кö налы мынтìсны 79 миллион 446,2 сюрс, то июньын 88 миллион 603,7 сюрс шайт.

* Миян районысь «За любовь и верность» медальöн пасйисны Лебежнöйысь Иван Николаевич да Роза Дмитриевна Булышев гозъяöс. 53 во нин öтлаынöсь. Быдтìсны-велöдìсны квайт челядьöс. Ставныс олöны семьяясöн, бать-мамыс кодь жö пыдди пуктана йöз. Булышевъяслöн 13 внук-внучка, куим правнучка, öти правнук.

* Кулöмдìнса шöр школаысь Константин Черных экзамен дырйи информатикаысь босьтìс 97 балл. Та мында балл районын медводдзаысь.

Зон предметсö велöдìс пыдìсянь. Тöдöмлунъяс сетìс Алексей Александрович Рассыхаев. Константин мöвпалö лоны информатикöн. Документъяс сетìс Санкт-Петербургса, Казаньса да Кировса вузъясö, виччысьö кывкöртöд.

* Ижевскын «Том лыйсьысь» ставроссияса ордйысигöн Тимшерысь Екатерина Булышева босьтìс мöд места, пöртìс олöмö Россияса спорт кузя мастерлысь норматив.

Ордйысисны странаысь медбур том спортсменъяс. Содтам, мый Екатеринакöд уджалö батьыс — тренер Александр Паршуков.