[ A+ ] /[ A- ]

Дiасёръяын

* Посёлокын 198 овмöс, олö 537 морт. На лыдын 274 нывбаба, 263 айлов. 12 морт 80 арöсысь ыджыдджык, уджвывса 58 ветеран.

* Уджалö 191 морт. Водзтi танi вöлi Помоздинскöй леспромхозлöн лесопункт, ставöн уджалiсны. Öнi эмöсь сöмын Е.А.Уляшевлöн да Н.А.Шебыревлöн пилорамаяс да «ОптимаЛес» котыр заптö вöр. Неважöн «Монди СЛПК вöр компания» котырлöн Кулöмдiн юкöнысь Помöсдiнса участок вайис Дiасёръяö вöр заптан комплекс. Но векжö 64 мортлы удж абу. Уджöн могмöдан шöринын пасйöма 5 мортöс. Мукöдыс оз лэччывны Кулöмдiнö, сы вöсна мый ветлöм вылö мунö уна сьöм.

* Кольöм воын чужис 4 кага. Юргис 5 кöлысь. Öти гöрöдö йитiсны олöмнысö Иван Игоревич Уляшев да Татьяна Владимировна Гончарова, Михаил Юрьевич Попов да Елена Ивановна Уляшева, Валерий Валерьевич Васильев да Юлия Владимировна Уляшева, Николай Васильевич Кузнецов да Анна Веньяминовна Уляшева, Владимир Валерьевич Нестеров да Анастасия Викторовна Уляшева.

* Ас керкаяс кыпöдöны Антонина Борисовна да Василий Анатольевич Кузнецов, Оксана Сергеевна да Андрев Алексеевич Гуляев, Мария Игоревна да Руслан Викторович Чигринов гозъяяс. Михаил Сергеевич Пильщик гöтыртöм на, но сiдзжö лэптö керка.

* Посёлоксаяс видзöны 12 мöс да 70 кукань. Йöв да яй сёйöны асьныс.

* Дiасёръяын ёна вотчöны В.А.Курочкин, В.К.Моторин да В.Е.Уляшев. Медся ёна кыйöны чери да вöралöны И.И. да И.В.Кармановъяс, Н.Э.Попов. Киподтуя йöз лыдын А.В.Уляшев, Л.А.Нехорошева, З.П.Уляшева.

* Посёлокса том йöз ёртасьöны спорткöд да тшöкыда ветлöны районса ордйысьöмъяс вылö.

* Кольöм арын локтiс армияысь 3 зон. Öнi служитö öти.

* Дiасёръяса юралысь А.А.Поповалöн водзмöстчöмöн сувтöдiсны Айму дорйысьяслы памятник. Сэнi пасйöма 18 мортöс.

* Школаын 59 нывка да зонка. Сетö тöдöмлунъяс 18 велöдысь. 38 во веськöдлö школаöн А.И.Попова.

* Садйö ветлö 18 челядь.

* Дiасёръяын ас вылö куим уджалысь. Лавка кутö А.М.Стяжкин, йöзöс новлöдлö В.В.Уляшев.

* Орслöн вöвлöм лавкаын öнi клуб. Татчö жö вуджис библиотека. Клубын тшöкыда овлöны гажа рытъяс.

* Посёлок да танi олысь йöз вöсна ёна тöждысьöны меставывса депутатъяс: велöдысь Р.В.Чигринов, библиотекар А.Б.Кузнецова, «Коми теплöвöй компания» котырлöн Кулöмдiнса юкöнысь мастер Н.И.Карманов, ас вылö уджалысь В.В.Уляшев, вузасьысь М.А.Левчук.

* Посёлокса олысьясöс медся ёна майшöдлö Помöсдiнöдз туй. Вöр кыскысь машинаяс помся жуглöны сiйöс, а дзоньтавны некод оз кöсйы.

Комментарии:

Комментарии запрещены.

Свежий выпуск: 28 марта

Осторожно — мошенники!