Зимстанын öзйöмъясысь доръян служба котыртчис 19 во сайын. Тайö кадöн лоис вöчöма унатор. Öнi öзйылöмъясысь йöзöс видзöны 24 морт, кодъяс пыр дасьöсь петны отсöг вылö кык кусöдчан машина вылын.
Владимир Васильевич Логинов котырын медся том, уджалö сöмын на öти во, но сяммис нин петкöдлыны асьсö бур боксянь уна петавлöмын.
— Профессия серти ме математика да информатика велöдысь, помавлiс Коми пединститут. Но специальносьт серти корсьны удж зэв сьöкыд, — висьталiс том кусöдчысь. — Мойвиис чужанiнын, Зимстанын, лои кусöдчысьöн. Ковмис, дерт, вылысь велöдчыны, но тайö туйвизьсö бöрйöм йылысь ньöти ог жалит.
Тшöкыда овлöны удж кузя велöдчöмъяс да тöдöмлунъяс кыпöдан курсъяс. Кусöдчысьяслöн удж зэв кывкутана, öд налöн кужöмлун да тэрыблун отсалöны дорйыны овмöс, дзоньвидзалун да олöм. Смена бöрын Владимир Васильевичöс гортас виччысьöны радейтана Анастасия гöтырыс да кык челядь.