Йöзлысь ловсö кыпöдöмöн

[ A+ ] /[ A- ]

2018 во республикаса юралысь С.А.Гапликов юöртiс культуралöн воöн. Такöд йитöдын культура юкöн сöвмöдöм могысь республикаса да федерацияса бюджетъясысь муниципалитетъяслы торйöдiсны матö 23 миллион шайт. Правительствоöн веськöдлысьöс медводдза вежысь Лариса Максимова индiс, кутшöм муниципалитетлы уна-ö юкны сьöм. Медуна, 2875 сюрс шайт, вичмис миян районлы (таысь кындзи, вичмас республикасянь да федерациясянь матö 3,3 миллион шайт).
Районса администрацияöн веськöдлысь С.В.Рубан носимсаяскöд регыд на аддзысьлiгöн шуис, мый тайö сьöм вылö босьтасны районлы торъя машина, кöнi эм гажöдчанiн. Тайö машинанас сьылан-йöктан котыръяслы позяс петавны ылi сиктъясö да грездъясö, кöнi абу клуб ни шойччанiн. Кольöм сьöм вылö сигöртасны Югыдъягса культура керка дзоньталöм, районса культура керкалы босьтасны ыджыд экран да с.в.
Районса олысьяс культура юкöнлысь уджсö донъялöны тадзи.
Надежда Михайловна Подюкова — Ручса культура керкаöн веськöдлысь:
— Районса культура юкöнлöн уджын медся майшöдланторйыс сiйö, мый эмöсь важ клубъяс, кöнi кöдзыд, вевтыс виялö, стен-джоджыс вушйöма. Та боксянь миян культура керкаын ставыс бур. Быдсямапöлöс арлыдаöс ми велöдам сьывны-йöктыны, кысьыны-вурсьыны, серпасасьны да с.в. Нималö «Сударушка» сьылан котыр, кодi петкöдчылö, сиктын кындзи, районын, республикаын да сы сайын. Кольöм воын ветлiм Архангельск обласьтса Коряжмаö регионъяскостса «Пес чипас» гаж вылö, лоим лауреатöн. Вичмöдiсны аппаратура, вурöны миянлы паськöм. Но миянлы колö выль культура керка. Öнiяыс вичкоын, вылiас юрбитанiн. Буретш та вöсна унаöн оз локны, кöть кöсйöны ёна. Найö кöсйöны, мед Ручын вöлi Донын кодь социокультурнöй шöрин, кöнi эмöсь клуб, спортзал, тренажёръяса жыр. Гашкö, культуралы сиöм тайö воын кывкутысь йöз кыласны да пыдди пуктасны миянлысь корöмнымöс.
Надежда Николаевна Груздева — Кулöмдiнса ань:
— Ме серти кö, культура юкöнса котыръяс уджалöны кывкутöмöн, быдлаын мунöны кыпыд гажъяс. Менам сöмын öти вöзйöм: мед шмонитысьяслысь да сюсьяслысь вермасьöм нуöдiсны юрсиктын, а эз сиктысь сиктö новлöдлöмöн. Öтарö-мöдарö ветлöм могысь транспортöн мед могмöдас сиктса юралысь.
Артур Сергеевич Гарнов — Донса социокультурнöй шöринöн веськöдлысь:
— Зэв бур, мый тайö восö сиöма культуралы. Нимкодь аддзыны, кор морт культура отсöгöн бергöдчö бурланьö. Муслун, эскöм, öта-мöдöс пыдди пуктöм да öта-мöдлы отсасьöм пыр кольöны йöзкöд. Миян Донса социокультурнöй шöрин пыр уна йöза: челядь и верстьö волöны татчö тшöкыда, кыпöдöны лов, песöны ки-кок. Тайö öтувтö ставнысö, сетö дзоньвидза олöм. Кута лача сöмын бур вылö: мед таво миян шöринын мунас унджык гаж да сьöлöм вöрзьöдан петкöдчöм.
Ольга Ивановна Кочанова — Кулöмдiнса шöр библиотекаын уджалысь:
— Культура юкöнлысь уджсö донъяла бурöн. Торйöн ошка районса культура керкалысь зiльöмсö, кöнi гажъяс мунöны воысь-воö пыр бурджыка. Оз кольччы и миян Кулöмдiнса шöр библиотека. Ми пыр корсьысям, пыртам уджö выльторъяс. Важöнсянь нуöдам енбиа йöзкöд аддзысьлöмъяс. Лыддьысьысьяслы, верстьöлы кöть челядьлы, зэв сьöлöм серти бурджыка тöдмасьны районса гижысьяскöд, быдтор вöчны сяммысь йöзкöд. Таво медводдзаысь корлiм Афганистанын вöвлöм И.П.Кузнецовöс, кодi челядьлы висьталiс сэнi мунöм тышъяс йылысь. Медым тöдмасьны выльторъясöн, тшöкыда ветлывла карö, кöнi аскоддьöмъяскöд юксям сямöн. Унатор босьтам öта-мöдлысь, а выльторсö пырта уджö ас ногöн нин, мыйяскö вежыштöмöн да выльмöдыштöмöн, лыддьысьысьяслысь корöмъяс тöдвылö босьтöмöн.
Галина НЕСТЕРОВА.

Комментарии:

Добавить комментарий

Свежий выпуск: 28 марта

Осторожно — мошенники!