Лунысь лунö уличьясын лымйыс чинö, а ю-тыын ваыс содö. Синоптикъяс шуöны, мый таво лымйыс усьöма быдвося норма серти неуна унджык. Сiдзкö, колö водзвыв дасьтысьны ытва кежлад. Республикаса уна сикт-грездын ыджыд ва кежлö заптöны ломтас-мавтас, лавкаясö вайöны сёя-юан, лекарство да мукöдтор, йöзöс овмöдöны мукöдлаö. Сы вöсна, мый ытва дырйи найö лоöны судзсьытöмаöн. Тайö Сыктывкарса Заречье да Сьöдкыркöтш, Вуктылса Дутов сикт, Печора районса Путеец да Даниловка, Луздорса Чöрныш да Орысь, Чилимдiнса Ермица сикт да мукöдъяс. Уналаын нин тупкöма ю вывтi вуджан туйяс. Синоптикъяслöн висьталöм серти Луза да Летка лунвывса юяс вылын нин йи вылас петöма ва, берег пöлöныс йиыс сылöма. Медым неминучаыс виччысьтöма оз су тiянöс, торъя нин ю дорын олысьясöс, вöзъя босьтны тöд вылö кымынкö индöд.
Ва дорын олысьяслы тайö кадыс вайö уна тöжд-нок. Ваыд виччысьтöма любöй здукö вермас матавны керка дорö, та вöсна ставсö колö вöчны водзвыв. Видзöдлöй керка пытш эмбур вылö. Дона техника да мебель лэптöй вылöджык либö нуöй косiнö. Гортса пемöсъястö недыр кежлö овмöдöй мöдлаö. Суседъясö петкöдöй либö овмöдöй рöдвуж дорö. Пыралöй джоджулö. Эз-ö мыйкö коланаторыс коль. Тэчöй кöтасьтöм пакетö шоныд паськöм, документъяс, пöнар либö сись, сотöвöй телефон, нуръясянтор. Ковмас кö тэрыба эновтны керкатö, медым лоас тыдаланiнын.
Водзвыв сувтöдöй керка бокö кузь леснич. Дасьтöй пыж либö плот. Абу кö аслад тайö эмбурыс, сёрнитчöй суседъяскöд да öтвылысь мездысьöй ыджыд ва дырйи.
Тувсовъя ойдысь юыд вермас вой шöрын суны нем виччысьтöг. Маталiс кö ваыс керка дорö, быть колö
кайны лöскö либö вевт вылö, öзтыны пöнар да сэнi виччысьны отсöгсö. Керкаысь петтöдз кусöдöй би, пöдлалöй биару кранъяс, öшинь-öдзöсъяс, томанасьöй. Пыр жö звöнитöй мездысьяслы либö висьтасьöй сиктса администрацияö. Лунын кö эновтанныд оланiнтö, быть висьтасьöй мунöм йылысь суседъясыдлы либö тöдсасялы. Медым мездысьяслы эз ковмы тiянöс весьшöрö корсьны.
Ва чинöм бöрын нокыс овмöсад сюрö. Унатор ковмас дзоньтавны, косьтыны, а гашкö, и шыбитны. Но медводз колö видзöдлыны би сутуга да биару кранъяс: эз-ö кыткö оръяв да жугав. Корлöй тöдысь йöзöс, медым видзöдласны да дзоньталасны бура. Öд тыдавтöм нелючкиторйыс вермас вайöдны пöжарöдз.
Неминуча йылысь пыр жö юöртöй мездысьяслы. Налысь телепонъяссö пыр кутöй син уланыд. 01– звöнитöй гортса телепонсянь,112 – сотöвöйсянь.
Биысь видзчысян служба да войтырöс доръян республикаса управлениеысь главнöй специалист Елена Лодыгина.