Выльторъяс

[ A+ ] /[ A- ]

Вынсьöдiс сöвет

Декабр 8 лунö районса администрацияын чукöртчылiс общественнöй сöвет.

Кывзiсны, кыдзи районса олысьяс донъялiсны культура, велöдан, физкультура да спорт юкöнъясысь уджалан котыръясöс, кыдзи районын пöртсьöны олöмö тöдчана балаяс, вынсьöдiсны районса администрациялы, велöдан управлениелы, физкультура, спорт да туризм, культура да национальнöй туйвизь кузя юкöнъяслы, контрольно-счётнöй комиссиялы, сьöм управлениелы во кежлö уджалöм вылö урчитöм сьöм. Сiдзжö видлалiсны да вынсьöдiсны 2017 да локтан 2018 да 2019 вояс кежлö районса бюджетлысь бала.

Пыдди пуктана олысь

Районса администрациялöн сайт вылö пыралöмöн быдöн вермас бöрйыны индöм вит мортысь öтиöс, кодлы позяс сетны Кулöмдiн районса пыдди пуктана олысьлысь ним.

Тайö Кулöмдiнса шöр бурдöданiнысь врач-офтальмолог Е.В.Гуляева, «Коми шоныд сетан» компанияысь Кулöмдiнса юкöнöн юрнуöдысь В.В.Воробьёв, «Пожöг» овмöдчöминлöн вöвлöм юралысь В.И.Сенькин, «Мыс» овмöдчöминлöн вöвлöм юралысь В.А.Паршуков, Югыдъягысь асшöр уджалысь В.В.Белый. Гöлöсуйтöм помасяс декабр 16 лунö. Йöзöн бöрйöм бöрын нöшта видлаласны да вынсьöдасны депутатъяс.

Ваялiсны тöвйымöн

Дзольсаяс тöвйымöн ваялiсны вöрысь пес ляпкыд лымйöн.

Ваялiсны «Белорусьöн» крестьянин овмöс кутысь Эдуард Витальевич Логинов да найö, кодъяслöн эмöсь бортъяса УАЗ-яс. Пример вылö, сiйöн матыстiс пессö пенсионер Николай Григорьевич Логиновлы электростанциявывса моторист Григорий Витальевич Логинов. Пес ваялiсны и вöвъясöн. Сиктсаяслöн керкаяс лоасны тöвбыд шоныдöсь. Эм тырмымöн ломтас и сиктса учреждениеяслöн.

Медся олöма

Декабр мöдöд лунö Тимшерысь Арнольд Данилович Кирстлы тырис 97 арöс.

Районын медся олöма морт. Сiйöс чолöмалiсны да бурсиисны олöмаяслöн районса котырöн юрнуöдысь Г.А.Кравченко, райсöветса депутат А.А.Кузнецова, Тимшерса юралысь В.А.Белова, олöмаяслöн Тимшерса котырöн веськöдлысь Г.Н.Парпшукова да мукöд. Олöмаяслöн посёлокса котыр козьналiс А.Д.Кирстлы сылöн олан туй йылысь снимокъяса альбом. Арнольд Данилович олö öтнас, ачыс на могмöдö асьсö. Сылöн куим пи. Таво ветлiс чужанiнас — Германияö.

 

Комментарии:

Добавить комментарий

Свежий выпуск: 15 марта

https://www.gosuslugi.ru/help/faq/mobile_election/2100910

Осторожно — мошенники!