Бура служитöмысь
Талун кежлö республикаса военкоматлöн Кулöмдiнса юкöнын пасйысис армияысь воöм 15 салдат.
Уналы часьтъясса командиръяс бура служитöмысь сетiсны ошкана гижöд, мед зонъяс кокньöд серти вермисны пырны вузъясö.

Выль станция
Немдiнын «Ростелекомлöн» Кулöмдiнса юкöн важ пыдди сувтöдiс телефон йитöда цифрöвöй станция.
Сiйöс сувтöдöм бöрын йитöд тöдчымöн бурмис, эз сöмын Немдiнын. öнi падмöгъястöг позьö звöнитны и сы пыр йитöм Смолянкаö, Мысö да Парчö.

Вермис Керчомъя
Ноябр 20 лунö пызанвывса теннисысь ордйысисны 15 арöса да томджык нывъяс да зонъяс.
Вöлi Кулöмдiнысь, Помöсдiнысь, Немдiнысь, Скöрöдумысь, Ручысь, Донысь да Керчомъяысь 31 спортсмен. Зонъяс пöвстын вермис Д.Козлов (Помöсдiн), мöдöн лоис М.Гичев (Керчомъя), коймöдöн — Э.Лодыгин (Керчомъя). Нывъяс пöвстын медбура ворсiс С.Ефремова (Скöрöдум), сыысь кольччыштiсны Керчомъяысь Е. да С.Лютоеваяс.
Котыръяс пöвстын вермисны керчомъясаяс, мöдöн лоисны скöрöдумсаяс, коймöдöн помöсдiнсаяс.

Вöчисны вуджанiнъяс
Помöсдiнса, да Немдiнса шöр, Скöрöдумса ичöт классъясса школаяс весьтын вöчисны туй вывтi вуджанiнъяс.
Лöсьöдiсны «куйлысь полицейскöйöс», потшисны туй пöлöнъяс, сувтöдiсны светофор, югзьöдiсны.

Вöчöдöм удостоверениеöн
ГИБДД-лöн районса юкöнысь инспекторъяс кыйисны вöчöдöм удостоверениеа водительöс.
Кор сувтöдiсны сiйöс да корисны петкöдлыны документъяс. инспектор казялiс, мый удостоверениеыс вöчöдöм. Водитель эз висьтав, кöнi велöдчис водительö, кодi сетiс документсö. Туялiсны, мый сiйöс некытчö абу пасйöма, а удостоверениеыс вöчöдöм. Водитель вылö панасны уголовнöй делö.

Уджалiсны öтув
Ноябр 18-20 лунъясö районын уджалiсны ГИБДД-лöн управлениеысь инспекторъяс.
Районса юкöнысь инспекторъяскöд кытшовтiгöн дасьтiсны 103 административнöй материал. Кык водитель руль сайö пуксисны код юрöн, квайтöн — правотöг, витöн челядьöс нуисны торъя кутöдтöг, 18-öн эз пысасьны тасмаöн да с.в.

Вичмöдiсны удж
«Помöсдiн» кооператив квайт мортлы кад кежлö сетiс удж.
Найö бöрйöны картупель, торйöдöны кöйдыс, вузалöм да скöтлы вердöм вылö. Пасъям, мый таво «Мондиöн» вичмöдöм сьöм вылö картупель видзанiнлысь вужвыйöн дзоньталiсны вевтсö. Удж вичмöдiсны буретш «Мондилöн» корöм серти.

Зарни да эзысь
Словакияса Нитра карын пневматическöй öружиеысь лыйсьöм кузя томъяслöн «Олимпиадалöн лача» мирса ордйысигöн Тимшерысь Екатерина Паршукова шедöдiс зарни да эзысь медальяс.
10 метра ылнасянь лыйсьöмöн Россияса котыр, кытчö пырö и Екатерина, лоис медводзын. Öткöн лыйсигöн 61 спортсмен пиын Е.Паршукова лоис мöдöн.

Тöв кежлö дасьöсь
Ростехнадзор кырымалiс Кулöмдiн районлöн тöв кежлö дасьлун йылысь паспорт.
Тайö висьталö сы йылысь, мый кöдзыдъяс кежлö дасьöсь «Коми теплöвöй компаниялöн», а сiдзжö мукöд котыръяслöн ломтысянiнъяс, найöс тырвыйö могмöдöма ломтасöн да дзоньталöма. Дасьöсь и муниципалитетлöн оланiнъяс, бурдöданiнъяс, велöданiнъяс, социальнöй юкöнса мукöд стрöйбаяс. Суас кö видзчысьтöм лоöмтор, колана службаяс öдйö сяммасны бырöдны сiйöс.

Донъялiс «Монди»
Ноябр 15 лунö районö волiс «Монди СЛПК» компанияысь вöрöн веськöдлöм да сертификация юкöнса инженер Марина Петровна Королёва.
Районса администрацияысь экономика да вот юкöнса медшöр эксперт Д.И.Липинкöд кытшовтiсны уджалан котыръяс, кодъяслы социально-экономическöй ёртасьöм йылысь сёрнитчöм серти вичмис сьöм. Волiсны Кулöмдiнса шöр школаö, кöнi сьöм вылö вежисны öшиньяс, Кулöмдiнса МТС-ö да «Пожöг» кооперативö, кодъяс ньöбисны йöлысь вöлöга вöчан оборудование, Пожöгса школаö, кодi вежлалiс джоджъяс, «Помöсдiн» кооперативлöн вужвыйöн выльмöдöм Скöрöдумса скöт картаö да картупель видзанiнö, кодлысь вужвыйöн дзоньталiсны вевтсö. М.П.Королёва бур боксянь пасйис районöс, кодi быд боксянь видлалöмöн дасьтö бур балаяс.

Бара А.Полубояров
Кыдзи юöртiс йöзкостса енби да сям кыпöдан республикаса шöрин, локтан воын «Василей» гаж бара пуктас Санкт-Петербургысь Алексей Полубояров.
Районса администрацияысь культура юкöнын веськöдлысь О.А.Васильева висьталiс, мый аддзысьлiс нин гаж нуöдысьяскöд да тöдмасис гаж нуöданноглöн гижöдöн. Сэнi, кыдзи и быд во, уна выльтор, кодъяс видзöдысьяслы лоасны сьöлöм серти. Гажлöн сюрöсыс сэтшöм, мый петкöдчасны и ас районса сьылысь-йöктысь котыръяс. Виччысьöны республикаса юралысьöс да Госсöветöн веськöдлысьöс.

«Шойччас» куим сутки
Ноябр 14 лунö суд видлалiс водительлысь административнöй торкöмъяс кузя делöяс да кывкöртiс сылы вештыны 800 шайт штрап да куим сутки «шойччыны» мыжмöмъясöс кад кежлö йöршитанiнын.
Тайö водительыс ноябр 11 лунö юрсиктса Сöветскöй улича вывтi мунiс машинаöн тасмаöн пысасьтöг. ГИБДД-са инспектор тшöктiс сувтны, но водитель пышйис. Тайö жö лунö тайö жö водительсö сувтöдiсны Шöр улича вылын, и бара пышйис. кутiсны сöмын мöд лунас.

Тулысöдз — йиа пос кузя
Пожöгын выльлунсянь босьтчисны лöсьöдны Эжва вомöн машинаяслы йиа вуджанiн.
Йи зумыдмöдö туйяс вöчан да дзоньталан Кулöмдiнса юкöн, вочасöн киськалöны ваöн. Берег дорсö, йи вылö каянiнсö, лöсьöдöны ныра тракторöн. Вуджанiныс ёна колö, öд мöдар берегас видз-му овмöс кооперативлöн турун, мöдлапöлысь жö пöрöдöны пес вöр. Да и Кулöмдiнö лэччан туйыс дженьдаммас матö 30 сайö километра вылö.

Сьöм оз тырмы
Кыдзи и мукöдлы «Зимстан» овмöдчöминса администрациялы сьöм кузя районса управлениесянь воисны 2017 во кежлö сiдз шусяна контрольнöй лыдпасъяс.
Урчитöмаöсь сетны 4 миллион 563 сюрс шайт, а арталiсны да колö матö кык та мында. Медводз сьöм колö югзьöдны уличьяс да весавны туйяс (кöсйöны бöр вуджöдны найöс овмöдчöминъяслы). Сьöм абу вöдитчыны юöр босьтан öнiя позянлунъясöн, машинаныс киссян выйын, 2008 вося. Нинöм вылö ньöбны сылы ломтас-мавтас.
Корлiсны нин дорйыны овмöдчöминлысь кöтшсö районса администрацияö. Сыöн веськöдлысь С.В.Рубан шуис, мый содтöд сьöм оз ло. Декабрын та кузя лоöны йöзлöн кывзöмъяс. Найö кö шуасны, мый татшöм бюджет оз лöсяв, кутшöм петан туй и аддзыны?
Велöдöны видзчысьны
Ноябр 16 лунö öкмысöд номера Кулöмдiнса садйö чукöртчылiсны районсысь дзоля челядькöд уджалысьяс да сёрнитiсны туйяс вывтi лючки ветлöм йылысь.
Велöдан управлениеысь специалист Н.Н.Нестерова тöдмöдiс республикаын да районын туйяс вылын лоöмторъясöн, кöнi вöлiны челядь. ГИБДД-лöн районса юкöнысь пропаганда кузя инспектор А.С.Попова пасйис, мый машинаöн мунiгöн оз быд бать-мам вöдитчы челядьлы торъя пуклöсöн либö кутöдöн, быдтасъяслöн паськöмö оз пысав би улын югъялан пас, оз велöд кагасö вуджны туй да с.в. Лючки ветлöм могысь бать-мамкöд уджалöмйылысь висьталiс Кулöмдiнса медводдза номера садйысь старшöй воспитатель Н.И.Липина. Том инспекторъяслöн уджöн тöдмöдiс челядьлысь енби сöвмöдан районса керкаысь велöдысь В.В.Потоцкая.

Вежисны вевт
Донса садлысь вежисны вевт.
Та вылö район вичмöдiс 380 сюрс шайт. Вевттисны профнастилöн. Вевтсö эз дзоньтавлыны 1982 воын садлöн воссьöмсянь да пыр виялiс.

Челядьлы отсöгöн
Ноябр 18 лунö вöлi челядьлы правöвöй отсöг сетан лунöн.
Такöд йитöдын районса культура керкалöн юöртан шöринын мунiс телефона «веськыд йитöд». Юалöмъяс вылö вочавидзисны велöдан, бурдöдан, социальнöя доръян, опека, пенсия фондлöн районса юкöнын, загсын, уджöн могмöдан шöринын, пытшкöсса делöяслöн районса юкöнын уджалысьяс, районса прокурор, райадминистрацияысь кывкутысь йöз, челядьлысь правояс дорйысь районса уполномоченнöй, республикаын мортлысь правояс дорйысь уполномоченнöйöс районын петкöдлысь. Звöнитлiс кöкъямыс морт. Став юалöм вылö вичмис вочакыв.

«Туган» — Егор Липин
«Пожöма ягын» мунiс том вöралысьяслöн «Туган» конкурс.
Нёль овмöдчöминысь вермасис вит том морт. Висьталiсны кывбур. йöктiсны, петкöдлiсны ворсантор да весиг пöжасисны.
Вермис Донысь Егор Липин, мыйысь вичмис диплом да сертификат.

Гажöдiсны «Эжваса дзоридзьяс»
Кольöм шойччан лунö Кулöмдiнысь «Эжваса дзоридзьяс» сьылан котыр гажöдiс Дiасёръяса да Скöрöдумса олысьясöс.
Юргисны коми, коми-пермяк да роч кывъяс вылын важ и выль сьыланкывъяс. Мичаа босьталiсны Ирина Симпелева да Артём Нестеров. Видзöдысьяс аттьöалiсны да корисны волыны нöшта.

Сиська биöн
Ноябр 18 лунö Кулöмдiнса шöр школаын казьтыштiсны туйвывса лоöмторъяс дырйи кулöмъясöс.
Öзйылiсны сисьяс, сулалiсны чöв-лöнь. Казьтыштiсны сизим мортöс. Чукöртчысьяс водзын сёрнитiсны ГИБДД-лöн районса юкöнысь А.С.Попова, челядьлысь енби сöвмöдан районса керкаысь В.В.Потоцкая, корисны ветлыны видзчысьöмöн.

Вöсни йи вылын
Кольöм шойччан лунъясö ичöт суднояс инспекциялöн Кулöмдiнса юкöнысь инспекторъяс ветлiсны Дон ты да Кулöмъю ю вылö.
Сёрнитiсны чери кыйысьяскöд, разöдiсны öлöдан-велöдан гижöдъяс, кыдзи кутчысьны вöсни йи вылын, петны ваö веськалiгöн.