ВЫЛЬТОРЪЯС

[ A+ ] /[ A- ]

Волiсны республика пасьтаысь
Октябр 29-30 лунъясö «Пожöма ягын» вöлi «Ас туй» паса республикаса чукöртчылöм, кодöс котыртiс Коми республикаысь национальнöй туйвизь кузя министерство.
Пырöдчисны и культура министерство, «Коми войтыр» да «Изьватас» öтмунöмъяслöн исполкомö пырысьяс. Волiсны Сыктывкарысь, Сыктывдiн, Сыктыв, Изьва, Печора, Удора да Кулöмдiн районъясысь да весиг Мурманск обласьтысь асшöр уджалысьяс, фермеръяс, культура да велöдан юкöнъясын уджалысьяс, киподтуйя йöз. Уджалiсны туристалöм да йöзкостса вöчасьöм кузя туйвизьяс вылö юксьöмöн. Юксисны асланыс сямöн, кужöмлунöн, велöдчисны öта-мöдлысь, лöсьöдiсны йитöдъяс, медым öтув водзö сöвмöдны уджнысö, велöдчисны сiдзжö вöчны балаяс, тшöтайтчыны да вöчны отчётъяс, венны уджаныс артмöм сьöкыдлунъяс. Уджалiс накöд психолог, кодi велöдiс, кыдзи бöрйыны колана туйвизья удж, кыдзи пуктыны мог, медым пырöдчыны да сöвмöдны сiйöс. Чукöртчöм йöз кык лунöн босьтiсны уна тöдöмлун. Бöрсö мунiганыс волiсны Ульянаса манастырö, тöдмасисны миян районлöн туристалан ордымъясысь öтиöн.

 

Вермисны кебанъёльсаяс
Шойччан лунö Кулöмдiнса «Олимпикын» мунiс айловъяслöн волейболысь районса ордйысьöм.
Вöлi Кулöмдiнысь, Кебанъёльысь, Помöсдiнысь, Ярашъюысь, Югыдъягысь, Донысь, Дереваннöйысь да Носимысь дас котыр, кодъяс ворсiсны матö войшöр кадöдз. Вермисны кебанъёльсаяс, мöдöн лоисны дереваннöйсаяс. Ворсасны водзö, медым тöдмавны, кутшöм местаяс босьтiсны мукöдъяс.

 

Шыöдчылiсны куимöн
Четвергö республикаса юралысьлöн районса примитанiнын мунiс вермытöм йöзлы гортаныс социальнöй отсöг сетöм кузя «веськыд йитöд».
Вочавидзис йöзöс социальнöя могмöдан шöринöн веськöдлысьöс вежысь С.М.Панюкова. Звöнитöмöн да сы дорö волöмöн шыöдчылiсны куим морт, кодъяс кöсйисны тöдны, кöнi позьö велöдчыны социальнöй уджалысьö, кутшöм сылöн могъясыс, стрöг видзöдлас улын-ö кутöны налысь уджсö. Öти ань шыöдчылiс мамыслöн оланiнысь би проводка вежлалöм кузя. Быдöнлы лоис сетöма вочакыв.

 

Юксисны тöдöмлунъясöн
Октябр 26-27 лунö Кулöмдiнö районса слёт вылö чукöртчылiсны челядьлöн общественнöй котыръяс.
Волiс кöкъямыс сиктысь дас чукöр. Челядьлысь енби сöвмöдан керкаын уджалысьяс В.В.Потоцкая, М.Я.Блинова, Я.В.Карманов да В.А.Липина велöдiсны бура кучкавны барабанö, ворсны горн вылын, вöчны аслыспöлöс дзоридзьяса ваза, тэчны палатка, гижны кутшöмкö лоöмтор йылысь гижöдъяс да с.в.
Рытнас Пожöма ягын мунiс «Команда -11» вермасьöм. Петкöдчисны челядьлöн нёль общественнöй котыр да кык водзмöстчысь нывка. Юксисны öта-мöдныскöд, мый бурторсö вöчисны аслас школалы, олöма йöзлы, челядьлы, кыдзи шойччöны, пелькöдчöны гöгöрбок, нуöдöны быдпöлöс удж да гажъяс. Сэсся челядьöс ворсöдiсны, нуöдiсны тренингъяс, а медся ёна сьöлöмö колис сиська би дорын рытся пукалöм, кор ныв-зон юксисны асланыс сьöлöмкылöмъясöн.
Вермысьöн лоис Керчомъяысь «Ребячья республика» котыр, а водзмöстчысьяс пиысь Югыдъягысь Арина Попова.
Аскöдныс челядь нуисны выль тöдöмлунъяс, кодöн сэсся юксясны аслас школаын.

 

Лоас лыжи база
Вылыс Ярашъюын вöвлöм леспромхозлöн пуысь вöчасянiнын босьтчисны вöчны лыжи база.
Сыктывкарса вöр переработайтан комбинатöн вичмöдöм сьöм вылö дзоньтасьны босьтiсны гипсокакртон, ДСП, краскаяс. 200 сюрс шайт вичмöдiс и район, медым выльмöдны вевтсö. Уджсö нуöдöны челядьлöн спорт школаса тренеръяс Н.Н. да В.Н.Кармановъяс.
Лыжи база колана, сы вöсна мый посёлокын унаöн ёртасьöны спорткöд, котыртöма лыжиöн котралöм, пызанвывса теннисысь да баскетболысь ворсöм кузя котыръяс. Торйöн нин сюртчöны челядь.
Районын тайö мöд лыжи база нин, кодöс вöчöны эновтöм важ стрöйбаысь. Таöдз лыжиöн котралысьялы ёнмöдчанiн вöчисны Керчомъяын.

 

Лоис кувмöныс
Октябр 26 лунö 17 гöгöр часын Керчомъяса Шöр улич вылын машина улö веськалiс нёль арöса кага.
Туй кузя «Хёндай Акцент» машина мунiс Зимстанлань. Овмöдчöминлöн администрация керка весьтын туй вылö чепöсйис кага. Мамыс вöлi сэнi жö. Дзоля морт кувсис тэрыб отсöг сетан машинаöн нуигöн.
Водитель вöлi садь. Таво административнöй кывкутöмö эз на кыскывны. Сы вылö панiсны уголовнöй делö.

 

 

Чукöртчылiсны депутатъяс да юралысьяс
Октябр 26 лунö вöлi райсöветса депутатъяслöн чукöртчылöм.
Видлалiсны 15 юалöм. Депутатъяс вынсьöдiсны «Кулöмдiн районса пыдди пуктана олысь» ним сетöм кузя положение, «Кулöмдiн районлöн 2016 да локтысь 2017 да 2018 вояс вылö бюджет йылысь» Сöветлöн шуöмö пыртiсны вежсьöмъяс, урчитiсны «Кулöмдiн районлöн 2017 да локтысь 2019 да 2019 вояс вылö бюджет йылысь» бала видлалöм кузя йöзкостса кывзöмъяс нуöдан кад да с.в.
Райадминистрацияöн веськöдлысьöс вежысь В.В.Бадьин юöртiс депутатъяслы да чукöртчöмаяслы, кыдзи районын котыртöма лöп-ёг да колясъяс чукöртöм да новлöм, кутшöм вежсьöмъяс лоасны тайö юкöнын локтан восянь.
Тайö жö лунö вöлi овмöдчöминъясса юралысьяслöн районса администрацияöн веськöдлысь С.В.Рубан дорын чукöртчылöм. Би кусöдан ывлавывса ва видзанiнъяс бöрся колана дöзьöр йылысь сёрнитiс би кусöдан часьтысь начальник А.А.Тимушев. Порсьяслöн африкаса чума сьöкыд висьöм паськалöмлы водзсасьöм йылысь юöртiс пемöсъяслöн висьöмъяскöд тышкасян станцияöн веськöдлысь В.А.Шепс. Асшöр уджалысь И.В.Ракин сёрнитiс районса йöзöс автобусöн новлдлöм кузя. Мый вöчöма овмöдчöминъясын асвеськöдлан котыръясöн, юöртiс райадминистрацияысь социальнöй политика юкöнöн веськöдлысь И.В.Лодыгина.

Комментарии:

Добавить комментарий

Свежий выпуск: 28 марта

Осторожно — мошенники!