ВЫЛЬТОРЪЯС

[ A+ ] /[ A- ]

Том бурдöдысьяс

Таво Помöсдiнса бурдöдчанiнö локтiс нёль врач.

Воис öти педиатр, кодi нöшта кутас уджавны и окулистöн. Син висьöмъяс туялöм могысь вöчисны нин торъя жыр. Виччысьöны оборудование. Олысьяслöн дзоньвидзалун бöрся тöждысьöны кык том терапевт да öдйö отсöг сетан юкöнса врач. Медколледж помалöм бöрын локтiс бурдöдысь Вылыс Вочö. Фельдшерско-акушерскöй пунктöн веськöдлö том фельдшер.

Нимöдiсны коми гижысьöс

Кольöм четвергын Дереваннöйса клубын мунiс «Юргö Тима Веньлöн ним» паса рыт.

Дереваннöйсаясысь кындзи, коми гижысьясöс волiсны нимöдны аныбсаяс да ручсаяс. Казьтылiсны В.Т.Чисталёвлысь олан туйвизьсö. Сёрнитiсны индöм сиктъясьыс петöм воддза да öнiяса гижысьяс да сьыланкыв тэчысьяс йылысь, öткымынъяс лыддисны ассьыныс кывбуръяс. Гижысьяслöн рыт вылö волiсны и Кулöмдiнысь районын бура тöдса журналист Н.А.Лютоев да «Миян Кулöмдiн» газетлöн шöр редактор И.И.Ногиев, кодъяс висьталiсны ас йывсьыныс да гижан туй йывсьыныс. Гажöдiсны Аныбса да Дереваннöйса сьылан котыръяс.

Лоас выль пос

Улыс Вочса Кирсикт да Титсикт костса шор вомöн регыд лоас подаяслы выль пос.

Важ вуджанiныс киссис, да резьöдiсны. Стрöитчан материал дасьтöм бöрын ёна кöдздöдтöдзыс босьтчасны вöчны. Уджъяссö нуöдасны асьныс сиктса йöз, дерт, сиктса администрацияса специалистлöн видзöдлас улын.

Чолöмалiс архиепископ

Дзоньтасян уджъяс нуöдöм бöрын Пожöгса Свято-Троицкöй вичкоын вит во сайын босьтчисны нуöдны службаяс.

Такöд йитöдын октябр 23 лунö мунiс Архиерейскöй вичко служба. Сiйöс нуöдiс Сыктывкарса да Коми-Зырянаса архиепископ Питирим. Вичко вöлi уна йöза, ылöдз юргис жыннянъяслöн мича да гора шы.

Вайöдасны би

Водзö дзоньталöны Пожöг весьтысь понтон пос, мунöны кöрт вундалан уджъяс.

Кулöмдiн районса электрическöй сетьясын зiльысьяс мöдлапöлас сувтöдiсны подстанция. Тайö вежонын сэсянь места вылöдз вайöдасны би, медым шаландаяс дзоньталысьяслысь уджсö нинöм эз падмöд да вöлi позянлун уджавны дырджык.

Комментарии:

Добавить комментарий

Свежий выпуск: 28 марта

Осторожно — мошенники!