Выльторъяс

[ A+ ] /[ A- ]

Лоисны медводзын
Сыктывкарын помасис «Дась уджавны да дорйыны» ставроссияса гожся фестивальлöн республикаса тшупöд.
Ордйысьöм мунiс Коми республикаса ветеранъяслöн вогöгöрся спартакиада тшöт весьтö. Петкöдчисны 40-сянь 70 арöсöдз спортсменъяс, кодъяслы лöсялö ГТО комплекслöн VIII, IX, X да XI тшупöд. Ветлiс и Кулöмдiн районса котыр. Аслас арлыдаяс пöвстын (70 да унджык арöс) айловъяс пиын медбурöн лоис Василий Павлов. Сиктса районъяс пöвстын Кулöмдiн район сiдзжö лоис медводзын.

 

Зимстанлöн тшупöда пас
Зимстанын кыпыда пасйисны посёлоклы 85 во тырöм.
Ыркыд, зэра поводдя вылö видзöдтöг, чукöрмылiс уна йöз. Волiсны районса администрацияöн веськöдлысь С.В.Рубан да культура да национальнöй туйвизь юкöнöн веськöдлысь О.А.Васильева. Медводз Зимстанö пыранiнын восьтiсны посёлоклöн нима да серпаса кöртысь вöчöм пас, та бöрын — посёлокын сувтöдöм баннер, кодöс дасьтiсны А.Хабузовлöн да Д.Гичевалöн серпас серти школаса велöдчысьяс. Серпас бокас — В.Лодыгинлöн кывбур. Гаж водзын вичкоса вежа ай Андроник нуöдiс служба. Кывкутысь йöз чолöмалiсны посёлоксаясöс тшупöда пасöн. Гаж вылын ордйысисны кык воропа пилаöн пилитчöмöн, кöнi вермисны Р.А.Кочанов да Н.М.Сурнина. Мичаа сьылöм-йöктöмöн гажöдiсны Дереваннöйса, Озъягса, Керчомъяса, Ручса да Зимстанса сьылан котыръяс. Рытнас ывла вылын вöлi файер-шоу — биöн ворсöдчöм, салют да йöктöм. Посёлоклöн тшупöда паслы сиöм гажъяс мунасны во помöдз.

 

Таво унджык
«Помöсдiн» кооператив 10 гектар вылысь босьтiс 196 тонна картупель, кольöм воын серти 56 тоннаöн унджык.
Косьтöм бöрын 40 тонна колясны кöйдыс вылö, лöсьöдасны вузöс вылö, посниöн вердасны скöтöс.

 

Ыдждöдлiсны вöрын уджалысьясöс
Сентябр 16 лунö районса культура керкаын чукöртчылiсны вöр овмöсын уджалысьяс.
Удж кузя праздникöн найöс чолöмалiс да бурсиис районса администрацияöн веськöдлысь С.В.Рубан, тöдчöдiс, мый вöр овмöс экономика сöвмöдöмö пуктö ыджыд пай. Висьталiс, кыдзи бергöдчöны талун, кутшöм отсöг вичмö налы районсянь. Сёрнитiсны и районса юралысь А.Н.Кондрашкин, районса администрацияöн веськöдлысьöс медводдза вежысь Е.А.Стяжкина, райсöветса депутат А.А.Кузнецова. Вöр овмöсын дыр да бура уджалысьясöс пасйисны почёт грамотаясöн да аттьöалан гижöдъясöн.


Комментарии:

Добавить комментарий

Свежий выпуск: за 23 ноября