Выль висьтъяс 

[ A+ ] /[ A- ]

Кызь öти 
Мöдöдча мунны армияö. Юрсиктса больничаын видлалöны дзоньвидзалунöс. Улыс гачöдз пöрччöдöмöн пыртлöны кыкаöн быд видзöдан жырйö. Пырим и ми орчча грездса салдатпукöд пель бурдöдысь дорö. Менö сувтöдiсны бокöджык, а ёртöс босьтчисны видзöдны водзджык. Синмö шыбитчис, мый зонкаыс тiралö тушанас, тöдчымöн майшасьö, яндысьö аслас тшупöда кыз рушкуысь. Пуксьöдiсны сiйöс паныдöн бурдöдысьлы, кодi вынъя мыйкö гижис бумага вылö, а медсестра бокö вешйöмöн босьтчис шöпкöдны лыдпасъяс, медым зон висьталiс сiйöс мöдпöръя. А сэсся водзö артмис со кыдзи: 
Медсестра: кызь öти. Салдатпу: кызь öти. Медсестра: нелямын вит. Салдатпу: нелямын вит. 
Врач юрсö лэптытöг гижигмоз чукöстiс медсестраöс: 
— Люба, волы татчö. 
Салдатпу: Люба, волы татчö. 
Врач: 
— Ланьт, мöмöт. Ог тэныд шу. 
Салдатпу: Ланьт, мöмöт. Ог тэныд шуууу…. — и садьсö воштiгмоз пöрис улöс вылысь джоджö. 
Врач: 
— Люба, вай пальöд нашатырканас тайö дивöторсö. Ме сэккостi гижа мöдöдны сiйöс морфлотö, гашкö, сэнi куим вонас мортсялас… 

Вошйöй да сибöдчöй 

Сиктсöветсянь комиссияöн мöдöдчим омöль оласнога семьяö, медым видзöдлыны да гижны акт, кыдзи олöны гозъя да налöн посни челядь, дзоньталöма-ö пач, заптöма абу тöв кежлö пескыс, ёна-ö сетчöны вина юöм вылö. 
Водзвыв öлöдöмнад ывла вывсяньыс неуна пелькöдчыштöмаöсь да керка пытшкыс абу сэтшöм дурк, кыдзи тшöкыда овлывлö, пеж дуксö тöлöдыштöмаöсь, тасьтi-пань ставсö мыськöмаöсь, челядь жырйö луншöра-лунö oзтöмаöсь лампочка, медым петкöдлыны, мый эм электричество. 
Овмöссö видзöдалöм да олöм-вылöм юасьöм бöрын, кор воис мунан кад, кöзяиныс, Сур Миш, шевкнитiс кыкнан кинас миянöс пызаньлань коригмоз. Сэнi сулалiс самöвар, тасьтiын вöлi неуна пöжас. Сiйö кыпыда да сьöлöмсяньыс вöзйис: 
— Вай жö сэсся, дона ёртъяс, вошйöй да сибöдчöй пöсь тшай дорö. 
Комиссияö пырысь Вась Роза та вылö весиг мытшъявны пондiс: 
— Мый нö тэ, Миш, водза-водз миянöс кулöмаö гижöдiн? Овны на быттьö окота, весиг завещанньö на гижтöм, а тэ миянöс ловъявылысь вошйöдны пондiн. Вай сэсся öвсьышт кузя юöмсьыд, а то асьтö ковмас регыд вошйöдны… 
Николай ИГНАТОВ.

Комментарии:

Добавить комментарий

Свежий выпуск: за 11 октября