Выль висьтъяс. Физика закон
Водзын посни машинаясыд сиктад лыда вöлi, тöвнад карö öнiя моз эз жöдзны öтарö-мöдарö, сiйöс семьяад видзисны-бабитiсны синтö моз, кагаöс моз лелькуйтлiсны, сiдз-тадз ылi туйö эз петавлыны. Карын велöдчысьяслы бать-мамыд сёян-юантö да мыйсюрö кöлуйысь ёнджыка мöдöдлiсны совхозса машинаяскöд. Найö кадысь-кадö пыр ветлiсны то öтрубла, то удобрениела, и карö мунысь шофёръясыд некор эз йöртлыны сиктса олысьясöс.
Гриша Ваньöс выль во водзвылын суис мог да ветлiс гаражö сёрнитчыны, мед кодкö босьтас Юрий пиыслы карö гортса яя сёян сумка. Тöдса шофёрыс Бронь Витьö висьталiс, мый кабинаын местыс оз ло, ассьыс том пöдругасö карöдз кöсйö нулыны, сумкасö ковмас нуны кузолын: тшук кö мыйкö кынмантор, то мöдысь мунiгöн босьтас, веж кöдзыднад кöть кыдзи вевттяв — куим частö мунiгöн ставыс измас. Нöшта öлöдiс: кык час асыв кежлö гаражö сумкатö матыст дай.
Кор водз асывнас Бронь Витьö лöсьöдчис пуктыны машина доддяс сумкасö, казялiс: Гриша Вань яя сёян сумка кындзиыс нöшта лöсьöдöма кык мешöк картупель. Чуймöмöн шуис:
— Мый нö, выжывмин али мый, изйöн картупельыд карöдзыд воас, оз сэсся шогмы нинöм вылö. Ачыд, небось, куим пöвса паськöма, юрыд уджалö оз?
Но Гриша Ваньöс он вен, шуö Бронь Витьöлы:
— То видзöд: кыкнан мешöкыс тыртöма джынвыйö, а мыйла? Тэ физикатö кö школаад велöдлiн, то колö тöдны — «при трении выделяется энергия в виде тепла». Прöст джынъя мешöкад картупельыд мунiгад öтарö-мöдарö бергалö, мый вермö ниртчö ас костас, а ниртчигад аслыс шоныд сетö, оз кынмы. Медшöрыс, ёна дыр кежлö машинатö эн сувтöд — сэки вермас и кöдзавны. Да öд и эшкынöн вевттьыштам. Эськö медводдзаысь на тадзсö мöдöда да, но чайта и кута лача, мый ставыс артмас…
Лун-мöд мысти Гриша Ваньö керка потшöс дорö бöрыньтчис машинаöн Бронь Витьö, кузовсянь шыбитiс лым толаö кык измöм турас, кодъяс грыпнитöмöн усисны кын муöдз пырöмöн, горöдiс пес поткöдлысь Гриша Ваньлы:
— Ваньö чож, порсьясыдлы карсянь гöстинеч вайим, местит, гид пельöс йирöмысь юмовджык, поди, налы лоö.
Гриша Вань ылöссö тöдiс нин, Юрий пиыс звöнитлiс да висьталiс, мый пеж дука кынмöн картупельсö бöр мöдöдiс, гашкö, гортса пемöсъяслы шогмас. Сöмын вомгорулас аслыс нурбыльтiс:
— Шуöма жö вöлi — туй костас некытчö дыр кежлö эн сувтлöй. Но кывзасны öмöй том йöзыд сэк, кор машина кабинаын лэччöны öта-мöдсö радейтысь кык морт.
Сэсся здук мысти ышловзьöмöн нюмсорöн содтiс:
— Оз öд тай прöстö шуны, мый муслуныд – гöгöрвотöм öтпомся химия. Кыдзи сэсся тайö кадас физика законыд кутас уджавны? Некыдзи…
Комментарии: