Война пансян воын Емдiнса педучилище помалöм бöрын Капитолина Константиновна Касевалы вöзйисны уджавны Вомынбöжса челядь керкаын.

[ A+ ] /[ A- ]

Но сiйö эз кöсйысь. Ыстiсны Канаваö. Вöзйысис фронт вылö, да эз босьтны. Канаваса школаын квайт во велöдöм бöрын локтiс Улыс Вочса школаö, кöнi уджалiс 1982 воöдз. Ичöт классъясын, вочсаясысь кындзи, вöлiны Вöлльысь, Дёмаысь, Мöскашорысь, Сотчöмулысь, Öкöсысь, Люблиноысь челядь. Öти велöдысь вылö чукöрмылiс матö 50 нывка-зонкаöдз. Капитолина Константиновна эз тöдлы шойччан лунъяс, эз петав отпускö. Быд гожöм мукöд велöдысьяскöд отсасьлiсны колхозын. Ань нöшта заседателялiс йöзкостса судын, кöнi янöдлiсны семьяын вывтiасьысьясöс, юысьясöс да öтув сувтöдлiсны веськöд туй вылö. Василий Степанович верöсыскöд быдтiсны да ас олöмö петкöдiсны куим челядьöс. Капитолина Константиновна моз жö велöдысьясöн лоисны Ольга Андреевна Лютоева внучкаыс да Эмилия Васильевна Лодыгина правнучкаыс.
Сентябр 17 лунö олöма аньлы тырис 95 арöс. Быд асыв чеччö, ки-кок песыштöм бöрын думсьыс пыравлö быд керкаö да чолöмасьö сиктса олысьяскöд. Эз на коставлы, пыр судзöдö да лыддьö «Парма гор» газет. Олöмысь оз кольччы, видзöдö телевизор, юöръясысь тöдö страналысь олöмсö.
Олöма аньöс тшупöда пасöн чолöмалiс да сетiс Россияса президент В.В.Путинсянь аттьöалан гижöд районса администрацияöн веськöдлысьöс медводдза вежысь Е.А.Стяжкина. Нимöдiсны да ыдждöдлiсны Вочса юралысь Н.Ф.Морохин, олöмаяслöн районса котырöн юрнуöдысьöс вежысь И.З.Ахмадова, Вочса шöр школаысь директор Ж.В.Ревеняла. Шоныд кывъяс висьталiсны öтлаын уджавлысьяс, матыссаяс да рöдвуж.
Гижöд Марина ДАДАШОВАЛÖН.
Снимок Жанна Ревенялалöн.


Комментарии:

Добавить комментарий

Свежий выпуск: за 23 ноября