Ворсöны и районсаяс

[ A+ ] /[ A- ]

Вужвойтырлöн шылада-драмаа театр — республикаын дзик öти театр, кöнi сёрнитöны комиöн. Кольöм воын сiйö пасйис котыртчöмсяньыс 25 во тырöм. Видзöдысьяслы бур козинöн лоисны «Вöр керка», «Эзысь шабдi», «Ош рöдвуж», «Зэв тешкодь морт», «Горш тулыс», «Эжва Перымса зонка» петкöдланторъяс.
Шылада-драмаа театрын ворсöны и миян районсаяс: Немдiнысь Альбина Карманова, Керчомъяысь Анна Попова да Владимир Уляшев, Помöсдiнысь Илья Карманов (öнi армияын, но служитöм бöрын кöсйис локны театрö бöр). Кольöм воын Москваса Щукинскöй училище помалöм бöрын локтiс Ангелина Шахова (Пожöг). Ставнысö найöс, а нöшта и театрса став артистöс, позяс аддзывны «Кабаре «Сыктывса кань» ворсöмын, кодöс шылада-драмаа театр петкöдлас апрель 26 лунö районса культура керкаын.
Ворсöмсö пуктiсны С.Журавлёвлöн гижöд серти. Кадыс — 1812 во бöр, кор Наполеон ворссис Россиялы войнаын. Пленö босьтöм французъясöс ыстiсны Усть-Сысольскö. Француз Анрилы мусмö коми Анна ныв. Налысь радейтчöмсö падмöдö сiйö, мый Анри — война вылын ёна доймалöм морт, а Анналöн эм нин жöникпу, яндзим тöдтöм, öвсьытöм, и тайöн сiйö ёна торъялö вежавидзысь Анриысь. Анрилöн Мишель ёртыс збойджык. Сылы сьöлöм вылас воö мича Глафира. Збыльмö купеч нывлöн гуся кöсйöм — петны «суйöрсайса принц сайö». Но йöзын видзан кад помасьö, французъясöс ыстöны гортаныс. Медшöр петкöдчысьясöс ворсöны Коми республикаса народнöй артистъяс Алёна Сметанина, Александр Ветошкин, Коми республикаса заслуженнöй артист Андрей Епанешников, Коми республикаса государственнöй премияöн пасйöм Анна Попова.
Лидия ЛИПИНА.
Шылада-драмаа театрлöн снимок вылын: «Кабаре «Сыктывса кань»
спектакльысь юкöн.


Комментарии:

Добавить комментарий

Свежий выпуск: за 15 ноября