Грездын 43 овмöс. Нёль керкаын олöны сöмын тулыссянь арöдз, тöвйöны карын. Сiдзсö сулалö 80 керка. 22 керкаын пасйысьöмаöсь, но олöны бокын, сы вöсна мый абу удж.
Грездын абу некутшöм уджаланiн. Йöз уджалöны Пожöгын: школаын, сиктса администрацияын, бурдöдчанiнын, видз-му овмöсса кооперативын, Кулöмдiнса сельполöн лавкаын, кусöдчанiнын — ставыс 23-öн. Ёнджыкасö бергöдчöны пенсия отсöгöн.
Грездын 132 морт — 57 айлов, 75 нывбаба, 18 арöсöдз 23, уджалысь 68 верстьö морт, 41 пенсионер. 2017 воын некод эз чуж.
Школаö ветлöдлö 10 велöдчысь. Студенталöны 11-öн. Пожöгса садйö ветлöны нёльöн. Тимофей да Надежда Сенькинъяслы абу на куим арöс.Челядь садйö да школаö ветлöны Пожöгö.
Грездын вит велöдысь: Татьяна Владимировна Шустикова, Анна Леонидовна Ладанова, Надежда Борисовна, Владимир Борисович, Светлана Борисовна Сенькинъяс.
43 олöма морт. Абу нин ловъя войнаса ни öти ветеран. Уджвывса 19 ветеран, войнадырся 6 челядь.
З.Д. да А.Д.Сенькина чойяслы отсасьö социальнöй уджалысь Н.Н.Мингалёва. Пожöгдiнсянь пыр волö подöн.
Грездын медся олöма Евстолия Александровна Попова. Сылы 94 арöс. Тöвйö Печораын нылыс дорын, Вомынбöжö волö гожöм кежлö.
Олöма йöз асланыс олöм-вылöм йылысь висьталöны тадзи: «Майбырöй, горт олам, печкам, кысям, вöчасям пуысь да кöртысь, кыям чери, ветлывлам вöрö, öта-мöд дорö волывлам юны чай». Кодсюрö ветлöны беддьöн йöткасьöмöн.
Танi олö афганец Дмитрий Михайлович Сенькин.
Ас вылö уджалöны фермер Василий Васильевич Сенькин, лавка кутысь Алескер Мурадович Бабаханов. Бöръяыс могмöдö сёян-юанöн да быдсяма коланторйöн. Абу кö, вайö корöм серти.
17 овмöсын видзöны скöт. Мöс сöмын кöкъямыс овмöсын, мукöдыслöн ыжъяс, кöзаяс, порсьяс, гортса дзодзöгъяс, чипанъяс. Скöт чинö воысь воö. Видзьяс мöдiсны эндыны да бадьсявны.
Грездын эмöсь киподтуя йöз. Унатор кужö вöчны пуысь Владимир Алекович Шустиков. Вöчасьö пуысь да гöгöрвоö техникаын Владимир Борисович Сенькин. Зэв бура вöчö рос Иван Михайлович Сенькин (Миколай Миш Иван). Тэчö пачьяс да унатор кужö вöчны электричество кузя Валентин Васильевич Сенькин. Зэв бура кысьö да дзоньталö кöмъяс Александр Вадимович Усов. Бур киподтуйöн тэчö пачьяс, вöчалö росъяс, öшинь рамаяс да öдзöс куричьяс Виктор Алексеевич Шебырев. Бура сваритчö да вöчасьö кöртысь Иван Михайлович Сенькин (Митрей Миш Иван). Сиктса шойна вылын вель уна сыöн вöчöм кöрт крест. Ас сиктса Кулибинъясöн шуöны Дмитрий Алексеевич Шаховöс да Иван Алексеевич Шебыревöс. Бура сваритчöны, вöчасьöны кöртысь.
Грезд чинö-бырö. Бöръя воясас кыпöдöны керкаяс Василий Васильевич, Андрей Васильевич, Владимир Борисович Сенькинъяс.
Кöлысьяс оз ворсны, бöръяыс вöлi 2013 воын Яков Николаевич да Анна Леонидовна Ладановъяслöн. Удж абутöм вöсна том йöз мунöны грездысь. Уна йöза праздник лунъясö да каникулъяс дырйи волöны внук-внучкаяс. Томулов ёна ветлöдлö Пожöгса культура керкаö, содтöд тöдöмлунъяс сетан шöринö да лыжи сеталанiнö.
Уна челядя семьяыс куим: Василий Васильевич Сенькинлöн вит, Андрей Васильевич Сенькинлöн куим, Дмитрий Алексеевич Шаховлöн нёль быдтас.
ФАП ни медпункт Вомынбöжын абу. Кодi вермö, ветлöдлö Пожöгса ФАП-ö. Морт кö висьмö чорыда, волöны бурдöдысьяс. Корöм серти бурдöдчанторъяс вайöны Пожöгса ФАП-ö, кодöн веськöдлö Р.В.Игнатов. Унаöн босьтöны Кулöмдiнысь. Кодсюрöлы вайöны карысь челядьыс.
Эм «Вомынбöжса колипъяс» котыр — олöма да том йöзлöн сьылан чукöр. Чукöртчывлöны Л.Н.Васильченковалöн керкаö.
Йитöдöн могмöдöны «Мегафон» да МТС. Бура уджалö интернет.
2017-öд воын Эжва вомöн нюжöдiсны выль понтон. Эскам, мый выль пос лоö и Пурга ю вомöн, кодi юкö грездöс кык пельö.
Лидия ВАСИЛЬЧЕНКОВА.