Декабрын лыддьысянiнса, культура да бюджет юкöнъясса уджалысьяс ветлiсны тöдмасьны Донса да Джеджимса музейясöн да лыддьысянiнöн.
Культура керкаса директорöс вежысь А.В.Голайдо туй чöж висьтавлiс районса нималанаинъяс да важся оласног йылысь. Ставöн сюся кывзiсны да унатор тöдмалiсны.
Медводз ми кежим Донö Василий Степанович Павловлöн нималана музейö. Сiйö петкöдлiс важся кöлуй, дозмукъяс, чери кыйысьяслы да вöралысьяслы коланторъяс. Тайö музейыс кывсьö ылöдз, волöны унаöн, кольöм воын волiс весиг поляк.
Сэсся мöдöдчим Джеджимö. Мунiгöн А.В.Голайдо висьталiс, мый сэтысь вайöм изъясöн лэптiсны Ульянаса манастыр. Грездын миянöс зэв пöся вочаалiс чужан му туялысь Зоя Степановна Напалкова. Медводз нуöдлiс музейö да петкöдлiс, мый сэнi эм. Висьталiс со мый:
— Водзтi, кор кералiсны пу, сiйöс аттьöалiсны, öд сыысь вöчисны быдторсö: дозмук, быдсяма пу кöлуй, кыпöдлiсны керка да с.в. Сюмöдысь вöчалiсны сэтшöм дозъяс, кодъясысь позис сёйны, видзны сэнi вöлöга. Ёна вöчасисны сёйысь.
Водзтi кагаясöс чужтылiсны быдлаын, но сöмын эз гортын. Медсясö пывсянын, мед эз лок керкаö лёктор. Чужис кö зонка, гартлiсны батьыслöн дöрöмöн, мед быдмис ёнöн. Пузчужöм кагаяс узьлiсны потанын, кодöс вöчлiсны асьныс батьяс. Уджыд сэки вöлi уна, кага видзысьяс пысавлiсны öти кöв помсö потанас, а мöд помсö кокас да лайкйöдлiгмоз печкисны ли кысисны. Водзтi бать-мам уджавны петлiсны водз да кагаяскöд пукавлiсны пöль-пöчьяс. Челядь отсасисны ичöтсянь. Сiдз, нывъяс велöдчисны печкыны квайт арöссянь нин, а 14 арöсöн кыисны нин серъясöн. Медся сьöкыда артмис коскытш — ыджыд вомидзысь видзöг. Водзтi ставöн ветлiсны коскытшöн. Быд котырлöн вöлi аслас пас.
Кор ныв петлiс верöс сайö, сылы дасьтылiсны ыджыд сундук тыр козинъяс — ставыс ас киöн вöчöмтор, тшöтш и коскытш, кодöс козьнавлiсны кöлысь дырйи.
Водзтi семьяяс вöлiны ыджыдöсь, быдтiсны уна челядьöс. Нöбасьысь нывбабаяс новлiсны партук — сiйö видзис кагаöс вомдзалöмысь. Сэки йöз таö ёна эскисны, бурдöдчанторъяс эз вöвны да бурдöдны вöлi нинöмöн. Чöрс вылын вöлi век сизим сер — тайö важся олысьяслöн аслыспöлöс лыдпас.
Видзöдлыны кö воддза да öнiя ичмоньяс вылö, торъялöмыс ыджыд. Важся нывбабаяс вылын кутчысис ставыс: колiс матыссаясöс вердны, пасьтöдны, кутны 

ыджыд овмöс, кыны джодждöра. Весиг некор вöлi велöдчыны.
Тайö музейыс чужис 2005 вося январ 5-öд лунö. Сыöдз вöлi Шöръягса велöдчанiнлöн чужан муöн тöдмöдан юкöнöн.
Ми нöшта ветлiм грездын чужöм гижысь Виктор Напалковлы сиöм лыддьысянiнö. Ыджыд йöрын сулалiсны пуысь вöчöм мичаторъяс да кыпыд керка — ачыс лыддьысянiныс. Сiйöс лэптылiсны 2013 воын сэки районса юралысь Д.А.Шатохинлöн отсöгöн.
Зоя Степановна висьталiс В.Напалковлöн олöм да гижöм йылысь, петкöдлiс важ снимокъяс. А сэсся велöдiс кыны коскытш.
Ми мöдöдчим бöр гортö мудзöмаöсь, но кыпыд руаöсь. Воим кывйö, мый тöдмалiм уна выльтор.
Галина КЛЮЖЕВА.
Гижысьлöн снимокъяс вылын: В.С.Павлов; висьталö З.С.Напалкова.