Миша Лодыгин талун, кыдзи и век, школаысь гортас воöм бöрын шыбитiс сумкасö да пыр и чуткис процессорлöн шлочканö. Компьютер гажаа журöбтіс. Зонка зіля пöрччысис, шыблаліс кыдзсюрö кöлуй-мöлуйсö да пуксис мониторлöн югзьöм öшинь водзö. Но веж туруна видз пыдди экран вылын петісны гырысь шыпасъяс: «Компьютерын вирус, öні жö кусöдöй бöр!» Миша повзис, весиг легнитчылiс юрсиыс. Пыр жö и тупкис сюсь вежöра ёртсö. 
Кор батьыс ньöбис компьютер, сійö лоис Мишалöн медся радейтана чачаöн. Асывнас палялöмсянь сёр рытöдз, кытчöдз бать-мамыс мырдöнсорöн оз водтöдны, сійö пыр мониторлöн экран водзын, лыйсьö, пасьвартö, сюся вöтöдö да бырöдö вöрöгъясöс, ачыс пышъялö наысь. Коставлö сöмын школаö ветлiгöн. А вöскресенньöö кузь лунтыр оз чеччыв пызан сайысь, рытнас синъясыс гырдöсь, вытьыс абу, сёйны нинöм оз ков. Войнас узьö лёка, вöталö повзьöдланторъяс. 
А талун компьютерас пырöма кутшöмкö вирус, мый сэсся и вöчны? Сёйыштöм бöрын Миша пасьтасис да петіс ывлаö. Орчча керка дорын ворсіс Коля Зезегов, сійö вомнас тургис трактор моз да зырйöн йöткаліс туй вылысь лымсö. Миша матыстчис Коля дорö. 
Кор рытнас банйöм чужöма Миша бöр пырис гортас, вöлі дзик лым сюръя, кöтасьöм гач кокъясыс пидзöсъясöдыс эз куснясьны, сöмын шпура-шпоракылiсны, но синъясыс нимкодьысла дзирдалісны. 
— Пап! Ми Колякöд сэтшöма ворсім, сэтшöма ворсім! Крепосьт вöчим да сэтысь немечьяссö вöтлiгöн ставнас кисьтім! Сэсся миянöс найö зырисны гид вылö, а сэсянь ми Колякöд кыдз тай чеччыштім лым пиас! Коля сибдіс да ме сійöс кодйи зырйöн. 
— Ті тай талун збыль ёна ворсöмныд, — нюмдіс батьыс. 
— Кынöмыд нö сюмалö-оз? – мыччысис мамыс. 
— Кысь нö оз! Час, пöрччыся да, шыдсö и роксö ректа, — серöктіс Миша. 
Мамыс да батьыс нюмъялігтырйи видзöдісны, кыдзи пиыслöн киыс тэрыба-тэрыба котраліс тасьтісянь вомöдзыс. Миша татшöм азыма эз панясьлы важöн нин. 
— Да! Папук, миян компьютерö вирус пырöма! — юрас воис зонкалы. – Колö кыдзкö сійöс сэтысь вöтлыны. 
— Збыль али мый? – быттьö чуймис батьыс. – Час, сідзкö, аски корла вöчысьöс. 
Урокъяс велöдöм бöрын водны лöсьöдчигöн Миша бара шыöдчис: 
— Аски, папук, сідзкö, эн вунöд вöчысьтö корлыны. 
— Корла, корла. Ог вунöд. 
Недыр мысти Миша зэв чöскыда нин нистіс-узис. 
— Мый нö, збыль али мый компьютерад вирус веськалöма? – юаліс Мишалöн мамыс. 
— Абу, ме заставкасö вежи, мед пиным шойччыштас, — нюмдіс бать. 
Иван НОГИЕВ.