Видз-му овмöсын да переработайтан юкöнын ужджалысьяслöн лун кежлö

[ A+ ] /[ A- ]

Кыдзи сöвмам
Государство, республика да район видз-му овмöс сöвмöмлы сетöны ыджыд тöдчанлун.
Кооперативъяс, крестьянин да ас овмöс кутысьяс пуктöны пай экономика сöвмöмö, республика да районса олысьясöс сёян-юанöн могмöдöмö. Налöн быдлунъя удж, тöжд-могъяс йылысь висьталiс видз-му овмöс министерстволöн районса юкöнö веськöдлысь Анастасия Ревокатовна Ярова.
-Талун миян сойборд улö пырöны «Пожöг» да «Помöсдiн» кооперативъяс, Кулöмдiнса МТС, нянь пöжаланiн Кулöмдiнса завод, Кулöмдiнса ПМК, ньöбасьысь-вузасьысь «Усть-Куломский» видз-му овмöс кооператив, 58 крестьянин овмöс збыльвылас уджалöны 39-ыс, 10 сюрс гöгöр ас овмöс. Бöръя воясö чинö скöт лыд. Вит воöн чинiс 1248 юр вылö и тавося январ кежлö артавсис 2631 юр, на пиысь 1667-ыс мöс. Скöтысь лэдзчысьöны ёнджыка ас овмöсъясын. Кооперативъясын лыдпас оз вежлась. Крестьянин овмöсъяс содöмöн содö и скöт лыд. Видз-му овмöс сöвмöмлы отсалöны государство да район. Тавося во джынйöн вичмöдiсны 24,6 миллион шайт. Та мында жö сетлiсны кольöм воын во гöгöр кежлö. Районлöн тöдчымöн бурмö видз-му овмöс вöсна тöждыс. Таво тайö юкöныслы урчитöма районса бюджетысь 6,9 миллион шайт, мый кольöм воын серти 44 процент вылö унджык. Видз-му овмöслы отсалöм кузя лöсьöдöм районса торъя программа серти да «Монди СЛПК» компанияöн отсалöмöн 2011-2012 воясын «Пожöг» да «Помöсдiн» кооперативъясын бурмöдiм-выльмöдiм кöрым заптан техника. Ньöбим тракторъяс, пресс-подборщик, «Роял» прицеп, ытшкан да гöрддзымö гартан техника. Программаö пыртöма племеннöй скöт, авторефрижиратор ньöбöм, скöт картаяс выльмöдöм-дзоньталöм кузя балаяс дасьтöм.
2011-2012 воясын районса комплекс аслас сöвмöм вылö пуктiс 35 миллион шайт, на пиысь 2011 воын ― 14, 2012 ― 21 миллион шайт. Тайö сьöмыс мунiс инвестицияа балаяс олöмö пöртöм, видз-му бурмöдан уджъяс, уджö выль технологияяс пыртöм, техника выльмöдöм вылö да с.в. На пиысь водзö сöвмöм вылö «Помöсдiн» кооператив веськöдiс 19,3 миллион, «Пожöг» — 7,2, Кулöмдiнса ПМК ― 4,2, Кулöмдiнса нянь пöжалан завод 1,4, Н.М.Шахова крестьянин овмöс ― 1,2, крестьянин овмöс кутысь Л.Н.Вологжанина ― 0,9, Кулöмдiнса МТС ― 0,6, «Усть-Куломский» видз-му овмöс кооператив — 0,2 миллион шайт.
Эштiс кöрым заптöм. Таво выль техника да технология отсöгöн «Пожöг» кооператив турунсö гартiс плёнкаöн гöрддзымъясö. Во гöгöр кежлö öти мöс вылö «Помöсдiн» овмöсын артмис 21 центнер кöрым (кольöм воын 18), «Пожöгын» — 18 (кольöм воын 16,5). Крестьянин овмöсъяс тöв кежлö заптiсны 688 тонна турун. Пасъя бур механизаторъясöс. Тайö «Пожöг» кооперативысь бригада, кöнi зiльöны Иван Дмитриевич Уляшев, Николай Александрович Шахов, Юрий Николаевич Мартюшев. Пыр водзмöстчö тракторист Пётр Васильевич Третьяков. «Помöсдiн» кооперативлöн Скöрöдум юкöнын бура уджалö Николай Степанович Шомысовлöн бригада, кытчö пырöны механизаторъяс Александр Дмитриевич Шомысов да Николай Константинович Пашнин. Став вын да эбöс сетöны уджлы, кадöн оз артасьны Помöсдiнса механизаторъяс Андрей Дмитриевич Курочкин, Михаил Васильевич Игнатов, Роман Алексеевич Игнатов да Иван Михайлович Карманов.
Картупель пуктö сöмын «Помöсдiн» кооператив. 10 гектар му вылысь идралiсны 190 тонна. Кольöм воын босьтлiсны 150 тонна. Крестьянин овмöсъясын идралiсны 280 тонна картупель.
Мöдöд во дорвыв Кулöмдiнса ПМК бурмöдö видз-му «Помöсдiн» кооперативлы. Уджъяссö колö вöчны 78 гектар вылын. Та вылö урчитöма 4 миллион шайт. Медся бур уджалысьяс лыдын механизатор Анатолий Иванович Мишарин да том специалист Владимир Александрович Лодыгин.
Тавося октябр 3 лун кежлö шöркодя быд мöслысь лысьтiсны 6,7 килограмм йöв. Тайö этша. Республика пасьта артмис 9,8 килограмм. Серпассö вежас кöрым бурмöдöм, йöв сетысь мöсъясöс племеннöй пöрöда вылö вежöм и, дерт жö, уджалысьяслöн асланыс удж дорö кывкутöм кыпöдöм. Унджык йöв лысьтiсны «Пожöг» кооперативлöн Кекурса фермаысь Любовь Борисовна Шаховалöн бригада, «Помöсдiн» кооперативысь лысьтысьысь Виталина Витальевна Уляшева. Бура тшöгöдö куканьясöс Зина Николаевна Уляшева. Уна вося бур уджысь аттьöала Пожöгдiнса фермаысь лысьтысьысьясöс, Мария Васильевна Шаховаöс, Татьяна Алексеевна Игнатоваöс, Надежда Михайловна Мартюшеваöс, Нина Егоровна Сенькинаöс.
Бöръя куим воöн котыртчис 51 выль крестьянин овмöс. Сэкжö кодсюрö эновтчисны, да тавося октябр кежлö артавсис 39 овмöс. Овмöсъясын видзöны этша скöт, сы вöсна оз вермыны босьтны государствосянь ыджыдджык отсöг. Медся гырысь овмöсъяс кутöны Кулöмдiнысь Ольга Борисовна Ракина, Керчомъяысь Нина Михайловна Шахова, Ичöт Аныбысь Люция Николаевна Вологжанина, Зимстанысь Алексей Васильевич Кочанов. Окота пасйыштны выль овмöс котыртысьясöс. Носимын Аловсар Бабаханов кыпöдö ыджыд скöт карта, кутас видзны-тшöгöдны порсьясöс да мöсъясöс. Донысь Алексей Иванович Тимушев водзö вылö оз сöмын кут босьтны да инавны районсаяслысь вöлöгасö, но босьтчас тшöгöдны öшпиянöс да куканьясöс, кыпöдас яйысь вöлöга вöчанiн. Уллянаысь Елена Евгеньевна Тарабукина асшöр овмöс восьтöм кузя балаöн петкöдчис районса конкурсын. Районса администрациясянь сылы вичмис 300 сюрс шайт вылö грант. Ньöбис племеннöй пöрöдаа мöсъясöс да лысьтысян аппарат. Кöсйö кыпöдны выль скöт карта. Дзолльысь Эдуард Васильевич Логинов тшöтш босьтiс грант. Скöт видзöм кындзи, кутас отсавны сиктсаяслы бергöдны видз-му удж тракторöн.
Йöзслысь лишалана йöв да яй примитöны Кулöмдiнса МТС, «Пожöг» да «Помöсдiн» кооперативъяс; яй да картупель босьтöны Кулöмдiнса да Помöсдiнса сельпояс, «Усть-Куломский» видз-му овмöс кооператив. Тавося öкмыс тöлысьöн Кулöмдiнса МТС сиктса скöт видзысьяслысь босьтiс 223 тонна йöв. Медся уна, 59 тонна, лишалана йöв сдайтiсны донсаяс. Керчомсаяс ― 49, мыссаяс ― 35 тонна. Бура лöсьöдiс йöзлысь лишалана йöв босьтöм Кулöмдiнса МТС-лöн вый вöчан завод, кодöн веськöдлö Надежда Николаевна Лопырева. Тöв кöть ар, тулыс кöть гожöм, лёк туйяс вылö видзöдтöг, ас кадö сиктъясысь йöв вайöны Эдуард Васильевич Тимушев да Юрий Васильевич Чисталёв.
«Помöсдiн» кооперативöн веськöдлысь Татьяна Владимировна Уляшеваöн водзмöстчöмöн да зiльöмöн олöмö пöртсьö нянь пöжаланiнысь йöлысь вöлöга вöчанiн лöсьöдöм кузя бала. Помöдз колö вайöдны выль оборудование лöсьöдöм. Содас йöлысь уна сикас вöлöга вöчöм.
Видз-му овмöс юкöнын уджалö 300 гöгöр морт. Уджалысьяслöн лыд воддза вояс серти чинiс 40 морт вылö, «Пожöг» кооперативын ― 24, «Помöсдiнын» — 10 морт вылö. Удждон ичöт. Öти морт шöркодя босьтö 6994 шайт, республикаын шöркодь удждонысь нёль пöв этша. Падмöдö и сiйö, мый «Помöсдiн» да «Пожöг» кооперативъясын 10 фермаысь öкмысыс меститчöма пу стрöйбаын. Кыпöдлiсны 1980-90 воясын да шогмытöмöсь нин. Локтан куим во кежлö медся ыджыд мог ― Пожöгдiнын 200 юр вылö скöт карта кыпöдöм, Скöрöдумын 240 юр вылö стрöйбасö выльмöдöм. Öнi уджалам документъяс вылын.
2013-15 вояс кежлö кутам водзö выльмöдны техника, пыртны выль технологияяс, бурмöдны да сöвмöдны овмöсъяс, ышöдны унджыкöс котыртны крестьянин овмöсъяс, могмöдны сиктсаясöс уджöн. Сиктъясын колö лöсьöдны ичöт бизнес сöвмöдöм кузя торъя программа, торйöн нин сэнi, кöнi абу крестьянин овмöсъяс (Вöльдiнын, Мысын, Немдiнын). Быдторйын отсавны крестьянин овмöс котыртысьяслы. Грант босьтöм могысь ышöдны пырöдчыны республикаса да районса конкурсъясö. Водзö кыпöдны-сöвмöдны видз-му овмöс рыноклысь удж, унджыклы ас вöлöгаöн петкöдчыны да вузасьны и районын, и Сыктывкарын.
Сёрнитiс да гижис Марина Дадашова.

Комментарии:

Добавить комментарий

Свежий выпуск: за 26 марта