Кольöм вося декабр 21 лунö пасйим районын пемöс бурдöдан юкöн котыртöмсянь 95 во тырöм. Чукöртчылiм «Квартет» нуръясянiнö. Волiсны уджалысьяс район пасьтаысь. Корлiм тайö служба сöвмöдöмö ыджыд пай пуктысьясöс — Кулöмдiнысь К.Е.Липинаöс, кодi 40 во вöлi пемöсъяс кузя медшöр врачöн, аптекаöн веськöдлысь Н.Н.Уляшеваöс, Югыдъягысь фельдшер Н.А.Панинскаяöс, Керчомъяысь фельдшер М.И.Колодиноваöс. Бергöдчылiм кольöм кадö, кор вöлiны колхозъяс да совхозъяс. Уна скöт видзисны и ас овмöсъясын. Бур кывъясöн казьтылiм медшöр ветврачьяс Арсений Фёдорович Каневöс, Александр Федосеевич Тарабукинöс, эпизоотолог Владимир Дмитриевич Зайцевöс, кодi туйдiс да велöдiс менö Сыктывкарса видз-му овмöс техникум помалöм да Кужйын уджыштöм бöрын.
Тшупöда пасöн чолöмалiс да бурсиис видз-му овмöсса да могмöдан рынокса министрöс вежысь — пемöс бурдöдан департаментöн веськöдлысь А.М.Белых. Пасйис, мый миян ветстанция республикаын медбуръяс лыдын, эм мыйö велöдчыны мукöд районсаяслы. Таын ыджыд пайыс ветстанцияса вöвлöм начальник Валентина Алексеевна Шепслöн, кодöс кольöм воын республикаын медводдзаöн пасйисны «Пемöсöс пыдди пуктана бурдöдысь» почёт грамотаöн. Видз-му овмöслöн Россияса министерстволöн аттьöалан гижöдъясöн пасйисны Парчысь Мария Николаевна Кармановаöс да Смолянкаысь Анна Васильевна Поповаöс, ставнас ветстанцияса котырöс.
Шоныд кывъяс висьталiсны видз-му овмöс юкöнса начальник А.Р.Ярова, Лузадорысь, Сыктывдiнысь, Кöрткерöсысь, Изьваысь, Сыктывкарысь, Воркутаысь да мукöдлаысь волысьяс.
Ыджыд аттьö öтырышъя отсöг сетысьяслы: Кулöмдiнса сельполöн правлениеöн веськöдлысь З.Г.Сухолуцкаялы, крестьянин овмöс кутысьяс С.А.Тимушевлы, О.Б.Ракиналы, М.Г. да Л.Н.Вологжанинъяслы, асшöр уджалысьяс Н.Е.Сладкоштиевалы да К.К.Лихомановлы. Ён дзоньвидзалун, семьяясын шань олöм, олöмын зумыда кутчысьöм.
Альбина ЛОГИНОВА,
Кулöмдiнса ветстанцияысь
районса эпизоотолог.
Виктор ОСТРЯКОВЛÖН снимок вылын: казьтылö К.Е.Липина.