Челядь творчестволöн районса керкаысь велöдысь Вера Вячеславовна Потоцкаялы (снимок вылын) челядьлöн международнöй котыр вичмöдiс «Пионериялы — 90» гöгрöс тшупöда пас. Эм мыйысь. Юркарса öтиöд номера педучилище бöрын 36 во нин уджалö челядькöд. Бöръя 16 восö юрнуöдö челядьлöн районса котырöн, кодi артмис сылöн водзмöстчöмöн.
— Талун районын матö 60 котыр, — висьталiс В.В.Потоцкая. — Чукöртчылiгöн чуйдöны выльторъяс да асланыс сикт-посёлокъясын пöртöны олöмö. Дереваннöйса ныв-зонлöн вöзйöмöн чукöртiсны войнаса челядь йылысь гижöдъяс лэдзисны диск да разöдiсны школаясö. Уджалöны и мукöд туйвизьяс серти. Отсасьöны олöмаяслы, ветеранъяслы.
Водзö вылö лоасны галстукъяс, асланыс паса паськöм, флаг. Челядьлöн районса котыр нöшта на сöвмас да нималас бур вöчöмторъясöн.