Немдiнысь Нина Ивановна Мурыгина (снимок вылын) велöдö 5-9 классаяслы математика да физика 46 во нин. Чужис Немдiнын, помалiс Коми пединститут. Мамыс шулiс, мый налöн вужйын велöдысьöн некод эз вöв, но 10 класс помалöм бöрын ёртъяс бöрсяыс мунiс пединститутö да помалiс сiйöс. А чуйдiс мунны сэтчö велöдысьыс — Мария Геннадьевна Карманова. Пасъям, мый Немдiнын велöдö и сылöн внучкаыс да Нина Ивановна отсалö сылы.
Нина Ивановна висьталiс:
— Дыр нин уджала да кöсйыла дугдыны, но корöны на уджавны. Со локтiс том велöдысь, колö сылы отсыштны.
Челядь пиысь кодкö велöдчö окотапырысь, кодкö оз, но ставныс зэв шаньöсь да вежöраöсь. Уна тöдöмлун босьтöны интернетысь, а водзтi ми судзöдiм журналъяс, вöчлiм урокъяс кежлö öдйö дасьтысьöм могысь картотека. Медуна кад мунö тетрадьяс видлалiгöн. Найöс пыр босьта гортö, удж вылын ог вермы. Локта, шойччышта да рытнас шöркодя уджала час кык.
Меным быть колö, мед урок вылын кывзысисны да эз дурны. Математика — тайö сьöкыд, но зэв колана предмет. Он кö велöд, олöмыс лоö гöгöрвотöм. Век шуа, мый велöдчыны колö бура. Кора, мед гортса удж пыр вöчисны бура да ас кадö, но кывзысьöны оз ставöн.
Нимкодь сэк, кор бура сдайтöны экзаменъяс, кор директор шулö, мый ми гижим медбура, кор мунöны велöдчыны водзö да нöшта кöсйöны лоны физика велöдысьöн.
Кор пыртiсны электроннöй дневник, повзььылi, но, вöлöмкö, нинöм сьöкыдыс абу. Дерт, удж содiс, оценкаяс пуктала журналö, уджалан тетрадьö да электроннöй журналö. Электроннöяс пуктала быд лун, кöть чайта, мый сэсь видзöдлö оз быдöн.
Менам Вероника Феликсовна Клаткевич нылöй велöдö посни челядьöс Югыдъягын. А ме ёна кöсйи, мед лоас бурдöдысьöн, да нулi весиг Кировö. 10 класс помалöм бöрын бергöдчис урокъяс помасьöм бöрын школаö кольччысь челядькöд, сэсянь мусмис велöдысьлöн удж да велöдчис сыö.
Эштiгöн видзöда телевизор, ёнджыкасö политическöй передачаяс, лыддя интернетысь выльторъяс. Сьöлöм серти дзоридзьяс, найö öшинь выв тыр. Ветла вöрö, вота пув да тшак. Водзын ветлi ылö-ылö, öнi сöмын матiгöгöрö. Пыр öтнам. Кыдз воö ар, сiдзи и кыскö менö вöрö. Бöръя кадö ёна шогöдö, мый вöрсö урöстöны.
Школа да велöдысь йылысь кыв шуис школаса директор Нина Ивановна Уляшева:
— Нина Ивановна — бур велöдысь, сетö зумыд тöдöмлунъяс да физикаысь олимпиадаясын сылöн челядь вермылöны. Отсалö том велöдысьяслы. Сiйöс пыдди пуктöны ставöн. Кора сiйöс уджавны водзö.
Миян школаын öнi 176 велöдчысь, 61-öн велöдчöны сöмын «4» да «5» вылö. Велöдчöны витлаысь: Смолянкаысь, Мысысь, Парчысь, Лебежнöйысь да Немдiнысь. Велöдöны 22-öн. 2017 воын районса «Медбур велöдысь» ордйысьöмын миян школаысь Галина Михайловна Опарина лоис мöдöн. Миян школа лоö вöр-вакöд йитöда республикаса шöринлöн юкöнöн, эм асланым лесничество. Бур йитöдаöсь вöр дöзьöритан Немдiнса овмöскöд. Вöчалам лэбачьяслы сёянiн, öлöдам, мед оз сотны турун, выль во водзвылын оз керавны козъяс. Нёль во нин петкöдчам республикаысь школаса лесничествояслöн чукöртчылiгöн. Вöлiм медводдзаöн да коймöдöн. 2015 воын ветлiм 10 лун кежлö школаса лесничествояслöн чукöртчылiгöн Крымö.
Сiдзжö петкöдчам спортын, баскетболысь вöлiм коймöдöн. Миян коми сикт да бура велöдам чужан кыв. Ёна петкöдчам олимпиадаясын, районын кольöм воын лоим коймöдöн. 2017 воын республикалöн тшупöдын ОБЖ кузя коймöдöн лоис Пётр Карманов. Гожöмнас школа бердын лöсьöдiм вöр-ва видзан да ёнмöдчан туйвизь серти шойччанiн, унаысь ветлiм вöрö, петалiм ва вылö. Вöчам ставсö, мед челядьлы вöлi бур, босьтiсны зумыд тöдöмлунъяс.
Гижöд да снимок
Галина КЛЮЖЕВАЛÖН.