Редакцияö шыöдчис юрсиктысь айлов, висьталiс, мый ичöт суднояс кузя инспекциялöн Кулöмдiнса юкöнсянь воис кабала, кытчö гижöмаöсь, мый öнi пыж пасйöм могысь водзиас колö пуктыны стеклö. Кыдзи пуктыны сiйöс важся пыжъясö, абу кö индöма лэдзысь заводöн? — майшасис сiйö. 
— Пыжъяс ми пасъялам öнi «ГОСТ Р ИСО 8666-2012 Суда малые. Основные данные» документ серти, кодöс вынсьöдiс Россия Федерация. Пасъялам сэтшöм пыжъяс, кодъяслöн сьöктаыс 200 килограммысь абу этшаджык, кытчö пырöны и заводöн урчитöм вынйöра мотор да бензин бак. Шуам, заводöн лэдзöм пыж кö индöма уджöдны 25 вöв вына моторöн, сэтшöмöн и пасъям. Но ветлыны позьö и ичöтджык вынйöраöн. Пуысь ли резинаысь вöчöм пыжъяс, кодъяс ветлöны 9,8 гöгöр вöв вына моторöн, пасйыны оз ков. Тöдчöда, мед пыж, кыдзи и лэдзис заводыс, вöлi водзиас стеклöа да «бордъяса». А лэдзисны кö пыжсö натöг, сiдзкö, оз ков. Пасъя, мый ю вылö петысьяслы быть колö пасьтавны вöйöмысь доръян жилет. Водзтi кö индылiсны пасьтавны сöмын пыжын пукалысьяслы, то öнi и веськöдлысьлы. Кывзысьтöмъяслысь перйыссьö 100-сянь 1000 шайтöдз штрап. Пыжö оз позь пуксьыны коланаысь унджык мортлы: индöма кö нёльлы, сiдзкö, сы мындаöн и колö пуксьыны. Тшöкыда казявлан, мый сöлöмаöсь пыж тырыс, а ва кывзысьтöмъяскöд оз шмонит: ю воссьöмсянь вöйисны нин куимöн. Куимнанныс вöлiны код юраöсь. Сэк- жö урчитöмторъяс торкалысьяс пыр эмöсь. Шойччан лунъясö регыд на петалiм ю вылö да кык лунöн лöсьöдiм жилеттöг ветлöмысь сизим протокол. Майсянь кыйим 49 торкалысьöс — жилеттöг ветлöмысь да пыжъяс пасйытöмысь. Видзöдлыны кö бöръя дас восö, серпасыс та кузя тöдчымöн бурмис. Районын талун кежлö восьтöма юдорса 11 шойччанiн, купайтчанiнъяс абуöсь. Районса олысьясöс корам бура шойччыны, кутны челядьнысö видзöдлас улын, медым öтнаныс эз пырны ваö, — висьталiс ичöт суднояс кузя инспекциялöн районса юкöнöн веськöдлысь И.Б.Попов. 
Галина Нестерова.