Валентина Николаевна, кыдз медсестра, тöждысьö челядьлöн дзоньвидзалун вöсна, видзöдö пусьысьяслöн удж бöрся, медым сыöн лöсьöдöм меню серти дасьтiсны чöскыд да пöтöса сёян-юан. А Ольга Ивановналöн тайö артмö бура. Сiйö ачыс Ярашъюысь. Öкмысöд класс помалöм бöрын велöдчис Выльгортса мöдöд номера профтехучилищеын пусьысьö. Думсьыс регыд кежлö локтiс Кулöмдiнö рöдвуж ордас, а артмис сiдз, мый кольччис дзикöдз: семьитчис, уджавны пырис татчöс садйö, зiлис воспитательлы отсасьысьöн, песласьысьöн, бöръя дас восö — пусьысьöн. Сiдзкö, эз весьшöрö ло тайö специальносьтсö босьтöмыс. Оз повзьöд сiйö, мый удж вылö колö локны водз, квайт час асылын, да и абу ёна кокни танi пач дорын лунтыр бергалiгöн, öд колö пусьыны-пöжасьны челядьлöн нёль котырлы. Но уджъёртыскöд вевъялöны ставсö. Уджыс сьöлöм сертиыс и, дерт жö, та вöсна сылöн кужысь киясöн артмöны небыд, банйöм пöжасъяс, чöскыд да пöтöса шыд-рок, мыйысь нимкодь челядьлы и налöн бать-мамлы. 
Гижöд да снимок Галина НЕСТЕРОВАЛÖН.