Менам киын важиник, вижöдöм, куим пельöса чукрасьöм письмö. Гижöдыс вушйöма нин, но лыддьыны позьö. Тайö — война вывсянь юöр. Письмöыс куйлiс жытникын матö 76 во. Кекурысь менам воча вок Афанасий Лужиков жытниксö косялiгöн аддзис да сетiс меным. Письмöыс менам ыджыд бать Александр Иванович Мингалёвсянь. Гортсаяслы мöдöдöма сiйöс 1942 воын. Гижö со мый:
«Видза оланныд-выланныд, менам гортсаяс: гöтыр Мария Порфирьевна, мам Евдокия Васильевна да ныв Ольга Александровна (менам мамöй — Е.У.). Сиа тiянлы ставныдлы бура да дзоньвидзаöн овны. Висьталöй месянь ыджыд чолöм Ольга чойлы да орччöн олысьяслы. Тiянсянь письмö воис 1941 вося декабр 12 лунö. Мария гижö, мый сельпоö корöны сюруклысь кусö. Оз кö мырдöн тшöктыны начкыны да верманныд кö кутны на, видзöй, век нин пызан выланыд лоас йöв да яй.
Талун лöнь, фашистыд лыйсьö омöля, со и пукси гижны тiянлы. Ме дзоньвидза. Шофёрала авторотаын. Опонь воклы мöдöдi письмö, ог тöд, воас сылы ли оз. Педöсей вок кö гижлiс письмö гортас, мöдöдöй сылысь адрессö, ог тöд, кöнi сiйö.
Прöщайтлöй ставныд. Коля дзоньвидзаöн да ловъяöн, мый сиа и тiянлы ставныдлы. Тiян А.Мингалёв. 1942 вося январ 15 лун».
Со кута письмöсö киын и петö синваöй. Ыджыд бать сувтö синъяс водзö: ыджыд тушаа, косньöд, но ён, пыр шмонитысь, ыджыд сяма морт. Сiйö вöлi бур кыйсьысь-вöралысьöн, сяммис вöчны пыжъяс, öшиньяс, дадьяс да додьяс — быдтор. Ми куим чоя-вока тшöкыда волiм сы дорö. Некор эг тöдлöй, мед пукалiс весь. Пыр ноксис сарайын, кодi тыр вöлi сыöн вöчöмторъясöн. Рытъяснас весиг шойччигмозыс пыр мыйкö вöчис: то чер пу лöсалiс, то пу пань ли тасьтi вöлалiс. Ми, челядь, кытшовтлiм сiйöс, видзöдiм, кыдзи ки увсьыс петiс вöчöмторйыс, да кывзiм сылысь висьталöмсö. Война йылысь нинöм некор эз казьтывлы. Нинöм пö эз вöв сэнi бурыс.
А тышкасис сiйö Победа шедöдтöдз. Дорйис Ленинград. Водителялiгöн ковмылiс унаысь вуджны Ладога ты вомöн. Водзынджык мунысь уна машина синъяс водзас вöйлiс йи улö, но сувтны да отсавны эз позь, пыр колiс мунны водзö.
Ыджыд бать вöрöгкöд тышын петкöдлiс повтöмлун. Сы йылысь весиг гижисны «Звезда» газетын. Гижöдсö мам клеитöма сьыланкывъяса аслас тетрадьын. Гижисны со мый: «Коми красноармееч Мингалёв повтöг тышкасьö вöрöгкöд. Подразделениеын сiйö медбур разведчик, бура вöчö быд тшöктöмтор, повтöг уськöдчö фашистъяскöд тышö. Тайö лунъясö разведчикъяс вочаасисны немечьяслöн котыркöд. Мингалёв ёрт виис куимöс, а ставсö бырöдiс нин 12 гитлеровечöс.
Мингалёв ёрт зэв кывкутысь, мукöдлы бур пример. Сёрнитö коми салдатъяскöд чужан кыв вылас. Велöдö, кыдзи вöдитчыны öружиеöн.
Тайö лунъясö Мингалёв ёртöс пыртiсны Ленинлöн-Сталинлöн партияса котырö».
Ыджыд бать война вылысь бергöдчис медальясöн, но некор эз пасьтавлы найöс. Кекурö волiгöн пыр ветлывла Александр Ивановичлöн да Мария Порфирьевналöн гуяс дорö, сулалышта, казьтыштла найöс бурöн. /тиыс дорйис Рöдина, мöдыс мырсис сиктын, отсалiс фронтлы сёянöн да шоныд кепысь-носкиöн. Ыджыд бать кулiс 1992 воын аслас муса Кекурын. Ыджыд мам сы бöрын олiс на öкмыс во. Быд волiгöн казявлi, кыдзи сiйö пыр ёнджык гöрбыльтчис, ичöтмис, но век уджалiс. Менö велöдiс кыны кепысь-носкияс, дасьтыны чöскыд мачтöм яй да ляз. Тайö дона йöзыс пыр менам сьöлöмынöсь.
Екатерина УЛЬНЫРОВА.
Руч.
Гижысьлöн снимок вылын: А.И.Мингалёв Победа пасъян лунö, кор сылы вöлi 78 арöс.