Юрсиктса кывтыдпомын Кулöмдiнö пыран туйсянь Пожöгö мунан туйöдз (Ленинлöн уличсайса да вöвлöм локаторвесьтса) 3,5 километр туй судлöн кывкöртöд серти кольöм вося ноябр 21 лунö дöзьöритны босьтiс «Кулöмдiн» овмöдчöминса администрация.
Тайö вильыд да весавтöм туй вылын унаысь вöлiны неминучаяс. Сы вöсна некод эз кывкут, кöть эськö «Кулöмдiн» овмöдчöминын. Ёна майшöдлö сiйö, мый полициялöн керкакöд орччöн выль керкаясö овмöдчисны батьтöг-мамтöг да йöз семьяясын быдмысьяс. Найö оланiнъясö вермöны воöдчыны-пырны сöмын тайö туйсянь. Тайö жö туйöд йöз локтöны полицияö. Та вöсна шыöдчи прокуратураö, мед шуисны ассьыныс кыв.
Прокуратура туясис да вöчис кывкöртöд, мый машинаяслы да подаяслы ветлан тайö туйыс лöсялö госстандартлы да шыöдчис судö. Сылöн шуöмöн 3,5 километр туй вöсна кутас кывкутны, видзöдны-дöзьöритны «Кулöмдiн» овмöдчöминса администрация. Полициялöн керка весьтö лöсьöдiс нин автобус сувтланiн да туй вуджан пасъяс. Колö лöсьöдны и автобус виччысянiн.
Ме бара шыöдча прокуратураö, мед сiйö тшöктас лöсьöдны-бурмöдны тайö туйсö, сувтöдны пасъяс да сэтi позяс ветлыны во чöж.
Денис ПАВЛОВ,
ГИБДД-лöн районса юкöнысь туй бöрся дöзьöр нуöдысь государственнöй инспектор.