Людмила Мамонтова Дiасёръяысь. Зэв водзмöстчысь да быдлаö вевъялысь. 15 арöса, помалiс 9-öд класс. Медся ёна радейтö йöктыны, век мöвпыштö выльтор. Челядьлöн котырöн юрнуöдысь, петкöдчö быд гажын да ворсöмын. Школаын асвеськöдлан лун дырйи индылiсны директорöн. 
Сылы дона вöр-ва. Уна кад сиö школаса лесничестволы, 2016 воын ветлiсны Тюменьö вöр-ва дорйысь котыръяслöн чукöртчылöм вылö да лоисны медводдзаöн. 
Людмила веськöдлö челядьлöн йöктан котыръясöн, öтиын йöктö и ачыс. Петкöдчылiс уна предмет кузя районса да ставроссияса олимпиадаясын да лоис медводдзаöн. Эмöсь аттьöалан гижöдъяс посёлокса да районса администрацияяссянь, Дiасёръяса клубсянь, Федерацияса Сöветын Коми республикаöс петкöдлысь Д.А.Шатохинсянь. 
— Ме ог вермы овны весь, окота пыр кöнкö петкöдчыны да мыйкö вöчны. Нöшта меным муса волейбол. Бать-мамöй волейбол кузя котыръяслöн капитанъяс, и ме асланым котырын капитан, — висьталiс Людмила. 
Людмилаöс донъялiс школаса директор А.И.Попова: 
— Людмила зэв шань, пыр нюмъялысь да водзмöстчысь. Бура лöсялö челядькöд. Сылöн кык вок да пыр мыйкö вöчöны öтлаын. Радейтö йöктыны. Велöдчö сöмын «4» да «5» вылö. Тöжда школалöн да посёлоклöн олöм вöсна. Дiасёръялы сиöм лунö сылы вичмис ас кöсйöмöн отсасьöм сöвмöдöмысь торъя козин. Сиа сылы шедöдны выль вермöмъяс. 
Галина Клюжева. 
Снимок Александра КУРОЧКИНАЛÖН.