Томöн ворслi гитараöн, но важöн нин киö эг босьтлы

[ A+ ] /[ A- ]

— Томöн ворслi гитараöн, но важöн нин киö эг босьтлы, кöть сьывны радейта, — висьталiс Носимысь Зоя Александровна Ульянова, кодi чужис танi 1928 воын. Олiс сьöкыда, ковмис ёна уджавны. 13 арöсöн пастукалiс нин, видзис 32 куканьöс. 14 арöссянь колхозын мешöкъясöн кыскалiс вартöм нянь. 16 арöсöн кылöдiс Вуктыл кузя вöр. Сэсся мунiс воча чой дорас Княжпогостö, пырис кöрт туй дöзьöритан удж вылö. Верöс сайö петöм бöрын мунiсны овны Москваса обласьтö. Сэнi олöм эз артмы да воис бöр чужанiнö, 20 во увйысис Носимса вöрпунктын. Сэки вöлi ёна кöдзыд да чорыда кынмавлiс, мыйысь висьлöны кокъяс. Петiс верöс сайö мöдысь да Михаил Степанович Нехорошевкöд олiсны 13 во. Сiйö кадсö казьтылö медся шудаöн. 
Нывбабалöн öти пи, кык внук да кык внучка. Анатолий Григорьевич олö мамыскöд, а гöтырыс да челядьыс Краснодарынöсь. 
Зоя Александровна уна во нин олö Паспомын. Ачыс пусьö да песласьö. Пуктöны да керöны пиыскöд картупель. Гожöмнас ветлiсны весиг вöрö, лунтырöн олöма морт мунiс матö 10 километр. Нывбаба ветлöдлö ёртъяс дорас пасйыны чужан лунъяс. Волöны и сы дорö, сьылöны-гажöдчöны, казьтылöны томдырся олöм. 
— Öнiя том йöзöс ме кора ёна уджавны, мед пыр вöлi вын-эбöс да олiсны дыр, — шуис олöма морт. 
Январ 11 лунö Зоя Александровналы тырис 90 арöс. Чолöмалiсны районса администрацияöн веськöдлысьöс вежысь Н.А.Чаланова, олöмаяслöн районса сöветöн юрнуöдысьöс вежысь И.З.Ахмадова, «Кулöмдiн» овмöдчöминса администрацияöн веськöдлысь В.П.Игнатов, олöмаяслöн Кулöмдiнса котырöн веськöдлысь В.П.Нестеренко. Сиисны ён дзоньвидзалун да сетiсны президент В.В.Путинсянь чолöмалан гижöд да козин. Уна бур кыв висьталiсны рöдвужыс, ёртъясыс. 
Гижöд да снимок 
Галина КЛЮЖЕВАЛÖН.

Комментарии:

Добавить комментарий

Свежий выпуск: 28 марта

Осторожно — мошенники!