Кыдзи юöртлiс нин «Парма гор» газет, январ 22-24 лунъясö Кулöмдiнын мунiс «2013 вося велöдысь» районса конкурс.
Вермасис районса школаясысь 10 велöдысь. Найö петкöдлiсны ассьыныс сям: нуöдiсны урок, сёрнитiсны бать-мамкöд, висьталiсны асланыс удж йылысь, мый радейтöны вöчны прöст кадö, кыдзи водзмöстчöны сиктса олöмын, мый вöчöны ассьыныс тöдöмлунъяс содтöм могысь.
Велöдысьясöс донъялiсны кык шуöмын: «да «Велöдысь-профессионал».
Районса медбур том велöдысьöн шуисны Югыдъягса шöр школаысь физкультура велöдысь Алексей Васильевич Гевейлерöс (снимок вылын). Мöдöн лоис Кулöмдiнысь ичöт классъяс велöдысь Анна Корниловна Стрельникова, коймöдöн — Лопъювадысь математика велöдысь Анна Валериевна Бодруг.
Уна во чöж велöдысьяс пöвстын медбурöн лоис Немдiнысь ичöт классъяс велöдысь Светлана Витальевна Пименова. Мöдöн — Кулöмдiнысь ичöт классъяс велöдысь Татьяна Витальевна Макарова, коймöдöн — Озъягысь физкультура велöдысь Евгений Александрович Нестеров.
Видзöдысьяс медвылö донъялiсны Дереваннöйысь коми кыв да литература велöдысь Татьяна Васильевна Зеленоваöс («Велöдысь-профессионал») да Кулöмдiнысь ичöт классъяс велöдысь Анна Корниловна Стрельниковаöс («Том велöдысь»). Налы вичмис видзöдысьяслöн приз.
Аттьöалан письмöяс да козинъяс вичмисны и конкурсö пырöдчысь мукöд велöдысьяслы: Помöсдiнысь соцпедагог Диана Степановна Петраковалы, Пожöгысь роч кыв да литература велöдысь Альбина Петровна Косныревалы, Помöсдiнысь коми кыв да литература велöдысь Татьяна Владимировна Уляшёвалы, Дереваннöйысь коми кыв да литература велöдысь Татьяна Васильевна Зеленовалы.
Вöчис конкурслы кывкöртöдъяс да сеталiс козинъяс райадминистрацияöн веськöдлысьöс вежысь Н.А. Левченко.
Районса медбур велöдысьяс — А.В.Гевейлер да С.В.Пименова — петкöдчасны «2013 вося велöдысь» республикаса конкурсын.
Таво дзик на медводдзаысь велöдысьяслöн конкурсын петкöдчысьяслы вичмисны козинъяс спонсоръяссянь. Велöдан управление атььöалö таысь «Агиевский» магазин да Анжелика Алексеевна Сметанинаöс, а сiдзжö «КонсультантПлюсКоми» котырöс районын петкöдлысь Ольга Евгеньевна Беловаöс вичмöдöм отсöгысь.