Лоасны военнöйöн 
Оборона кузя министерстволöн вузъясö районысь вермисны пырны куимöн да август 1-öд лунсянь велöдчöны нин. 
Медицина кузя Санкт-Петербургса военнöй академияын велöдчö Пожöгысь Ирина Смирнова. Парчысь Пётр Карманов пырис национальнöй гвардиялöн Перымса военнöй институтö, Скöрöдумысь Ярослав Ефремов М.А.Бонч-Бруевич нима Санкт-Петербургса академия бердын военнöйясö велöдан шöринö. 

Вочöс оз вöрöдны 
Май 12-öд лунсянь районын вöрса лудiк курччалiс 137 мортöс, на лыдысь 37 челядьöс. 
Медся азымöсь Югыдъягын, Тимшерын, Зимстанын, Керчомъяын да Донын, омöльджыка дöзмöдчисны Кулöмдiнын, Помöсдiнын, Кебанъёльын да Пожöгын. Некодöс эз вöрзьöдны «Улыс Воч» овмöдчöмин-ын. Лабораторияын туялöм бöрын öти гагйысь, кодi тшапкысьлiс Канава дорса вöрын, сюрис Лаймлöн висьöм. 

Кужса эз сюр 
Август 23-öд лунö районса администрациялöн дежуритан юкöнö воис юöр, мый лунöн водз Ыджыд Кужса олысь Николай Фёдорович Тарабукин мунiс вотчыны да бöрсö эз лок. 
Корсьысисны сиктсаяс, «Спас-Коми» доръян котыр, полицияысь понъясöн кык кинолог, но мортыс эз сюр. 
Август 23-öд лунö вошлiс Керчомъяысь Андрей Николаевич Кузнецов, но ачыс петiс мöд луннас. 

«Помöсдiн» вевтыртiс 
«Помöсдiн» кооператив вевтыртiс кöрым заптöм кузя урчитöмсö. 
Вöчис колана 1200 тонна пыдди 1357 тонна сенаж да 900 тонна турун (180 процент). Силос гуö сюйис 1200 тонна веж масса (92 процент). 
«Пожöг» урчитöм 450 тонна турунысь вöчис 401-öс, сюрс тонна сенажысь 957-öс. Эз на босьтчывны вöчны силос. 

Мед лоны «народнöйöн» 
Пытшкöсса делöяс кузя министерстволöн районса юкöн участокса ыджыд сяма кык уполномоченнöйöс вöзйис Россияса министерствоöн котыртöм конкурсö, мед шедöдны «народнöй» ним. 
Борис Владимирович Зезегов юкöнын 1996-öд восянь, Руч участокса уполномоченнöйöн лоис 2011-öд воын. Керчомъяысь Андрей Викторович Тимушев юкöнын 2003-öд восянь, йöзлöн лöнь олöм вöсна тöждысьö 2011-öд восянь. Отпускъяс дырйи вежлывлöны мукöд участокъясысь уполномоченнöйясöс. 
Сентябр 11-сянь 20-öд лунöдз Б.В.Зезегов да А.В.Тимушев вöсна позьö гöлöсуйтны Россияса МВД-лöн торъя сайт вылын. 

Вöчöма кöрт тувтöг 
Сентябр 5-öд лунö сигöртiсны Пожöгса вежа Троича вичкоын дзоньтасян уджъяс. 
Куим вежонöн дзоньнас вежисны да выльпöв эжисны жöсьтöн вичколысь лунбокса вевтсö. Вежа ай Тихонкöд уджалiс Ростов обласьтса Волгодонск карысь куим морта котыр. Уджсö бергöдiсны кöрт тувтöг — ставыс йитöда.