Дзоньталöны туй

Туйяс вöчан да дзоньталан Пöмöсдiнса юкöн мастер Ю.А.Чисталёвлöн веськöдлöм улын лöсьöдö Пожöгса шойна дорысь туй.

Туй öтар-мöдар бокъясас кодйис гуранъяс, а перйöм мусö шыльöдiс-тэчис машинаяс ветланiнö. Сьöм вичмис республикаса бюджетысь.

Татшöмсяма уджъяс бергöдiсны июль шöрсянь коставлöмъясöн матö тöлысь чöж Пожöгдiн сайса Ыджыд Шор таладорын и мöдарын. Кералiсны туй пöлöн быдмысь бадьяс. Ставöн кутöны лача, мый арся зэръяс бöрын татi кутасны повтöг мунны машинаясöн, öд тулыснас тайö юкöныс вöлi ветлыны позьтöм.

Зэв колана пос

«Йöзкостса бюджет» уджтас серти вичмöдöм сьöм вылö босьтчисны вöчны Вомынбöж сайын Пурга ю вомöн пос.

300 сюрс шайт торйöдiс ресублика, 38-öс овмöдчöминса бюджет, асьныс вомынбöжсаяс чукöртiсны нёль сюрс сайö шайт. Пос кутас вöчны Помöсдiнысь асшöр уджалысь В.И.Уляшов. Подув улас ваялас кöрт сваяяс, метраöн-джынйöн пасьта пос сiдзжö лоас кöртысь. Поскыс зэв колана — тулыснас ыджыд ваöн грездсаяслы некыдз вуджöны кулöмаясöс шойна вылö.

Идралöны картупель

Сентябр 10-öд лунö «Помöсдiн» кооператив петiс идравны картупель.

Нёль гектар вылысь керисны 30 тонна. Керчомъяысь «Здоровая наÖия» кооператив нёль гектар вылысь жö босьтiс 40 тонна. Ичöт Аныбысь крестьянин овмöс кутысь М.Г.Вологжанин 1,6 гектар вылысь босьтiс 13 тонна. Сёрöн пуктысьöмöн эз на ставныс петны идравны мöд нянь.

Ломтысигкежлö дасьöсь

«Шоныд сетан Коми компаниялöн» Кулöмдiнса юкöнлöн 20 ломтысянiн дасьöсь тöв кежлö.

Сентябр 12-öд лунö Кулöмдiнса шöр да Зимстанса ломтысянiнъяс сетiсны шоныд садъясö, школаясö, бурдöдчанiнъясö, олöмаяслöн да вермытöмъяслöн керкаö да мукöдлаö. Олан керкаясö шоныд оз на во. Сетасны медводз налы, кöнi олысьяс шыöдчисны да вештысисны шоныд мунан трубаяс пожъялöмысь.