Кулöмдiнса том йöз, чайта да, кывлiсны «YоJo» котыр йылысь, кодi снимайтö миян сиктса олöм йылысь видеороликъяс. 
Июльын районын уджалiс Коми республикаса юралысь С.А.Гапликов. Сiйö чукöртлiс и томуловöс, мед тöдмавны налысь тöжд-могъяс. Сёрнитiгöн «YоJo» котырсаяс висьтыштiсны ас йывсьыныс да юöртiсны, мый окотитöны веськавны «Юрган» телеканал вылö, мед велöдчыштны налысь. Тайö корöм вылö С.А.Гапликов вочавидзис зэв дженьыда: «Позьö шуны, сёрнитчим». 
Векжö кор звöнитiсны да корисны «Юрган» вылö, тайö лоис телестудияöн веськöдлысь В.А.Липиналы да сэтчö ветлысь челядьлы нимкодь виччысьтöмторйöн. Найö важöн нин мöвпалiсны та йылысь, и со кöсйöмныс збыльмис. Ветлiсны Анастасия Турьева, Валерия Эрдни-Араева, Антон Арестенко да Виталий Игнатов. Стажируйтчисны кык лун. 
Со мый висьталiс тайö ветлöм йылысь Анастасия Турьева: 
— Тайö кык луныс колясны дыр казьтыланаöн. Миянöс зэв шоныда паныдалiсны «Юрган» вылын, став уджалысьыс зэв вежавидзысьöсь да шаньöсь. Медводз аддзысьлiм генеральнöй директор А.Ю.Кузнецовкöд, кодi висьталiс асланыс удж йылысь. Сэсся пыдiсянь тöдмöдiсны став редакциялöн уджöн. Ми аддзим, кыдзи уджалöны монтажёръяс, корреспондентъяс да звукооператоръяс. Весиг асьным нуöдiм выльторъяс. Позьö шуны, мый абу сьöкыд, но майшасяна. 
Мöд лунас ми мунiм национальнöй да абу олимпийскöй спорт сикасъяс кузя ордйысьöм восьтöм вылö. Сэсянь «Юрган» нуöдiс веськыд репортаж. Миянлы петкöдлiсны и висьталiсны, кыдзи тайöс вöчöны: машинаын компьютер сайын пукалöны йöз да аддзöны ставсö, мый снимайталöны уналаö сувтöдалöм камераяс. Камераыс вöлi квайт. Машинаын пукалысьяслöн эм став операторыскöд рация пыр йитöд. Сэсся найö нин бöрйöны, мый аддзасны видзöдысьяс. Ми видзöдiм, кутшöм öтувъяöсь «юргансаяс». Янсöдчигöн миянлы шуисны, мед ми мöдöдiм ассьыным видеороликъяс. Мыйсюрö кутасны петкöдлыны «Юрган» вылын. 
Котырлы ёна отсалiс районса администрацияöн веськöдлысь С.В.Рубан, кодi аддзис стажируйтчыны ветлiгкежлö карысь оланiн. 
Долыд аслас челядьлöн шедöдöмторъясысь и Вероника Александровна Липиналы: 
— Дерт, зэв бур, мый миян артмис тайö ветлöмыс. Челядь тöдмасисны телеведущöйлöн уджöн, найö видлiсны лыддьыны выльторъяс. Миян колины сöмын бур казьтылöмъяс. Тöдмасим нималана йöзкöд, кодъясöс тшöкыда аддзывлам телевизор пыр. Зэв ыджыд аттьö республикаса юралысь С.А.Гапликовлы, кодi мунiс воча да сёрнитчис ветлöм кузя, «Юрганлы» да сылöн директор А.Ю.Кузнецовлы, Кулöмдiнса администрацияöн веськöдлысь С.В.Рубанлы, велöдан управлениеса начальник О.В.Лебедевалы, челядьлысь енби сöвмöдан керкаса директор О.А.Тюрниналы и, дерт жö, челядьлöн бать-мамлы, — висьталiс В.А.Липина. 
Эскам, мый тайö ветлöм бöрын ми аддзам нöшта на интереснöйджык видеороликъяс. 

Галина КЛЮЖЕВА. 
Снимок интернетысь.